ЦХИНВАЛ, 19 ноя — Sputnik. "Ирон культурæйы бонтæ" суыдзысты "Ирыстоны презентаци", цыран фадат фæзындзæн райсын хайад Хуссар æмæ Цæгат Ирыстоны официалон адæмæн, бизнес, культурæ, зонад, УФ-йы минæварад Бельгийы æмæ Европæйы бæстæты ирон диаспорæты минæвæрттæн, фехъусын кодта Sputnik Уæрæсейаг организациты бельгиаг федерацийы сæргълæууæг, ассоциаци "Сæндидзæн"-ы сæргълæууæг Пухаты Радион.
Йæ ныхæстæм гæсгæ, "Ирыстоны презентаци" æвдисдзæн Ирыстон, куыд регионы культурон, спортивон, зонадон æмæ туристон центр. Æвæрд æрцæудзæн стенд Ирыстоны рауадзгæ продукцийы хуызæгтимæ, националон къæбицимæ, адæмон сфæлдыстады дзаумӕттимæ, чингуытимæ, сувениртимæ æмæ а.д.
"Проекты фæлгæтты арæзт цæудзысты фембæлдтæ Ирыстоны æмæ Европæйы бизнесы минæвæрттимæ, уæлдай цымыдис сæвзæрын кæндзæн аграрон сектор, туристон сектор. Нæ зыдгонд спортсментæ бынæттон клубты æмæ спортивон секциты уадздзысты мастер-класстæ. Сæ арæхстдзинад дзы æвдисдзысты фольклорон коллективтæ", — загъта Пухаты Радион.
Уый ма радзырдта æндæр проекты тыххæй — ирон дæсныты куыстыты равдыст "Европæйы тæмæн", кæцы байгом уыдзæн декабры Дзæуджыхъæуы, Тугъанты Махарбеджы номыл националон музейы бæстыхайы. Раздæр равдыст куыста Мæскуы æмæ Цхинвалы.
"Равдысттæ æнтыстджын кæй уыдысты, уый тыххæй аскъуыддзаг кодтам "Европæйы тæмæн" равдисын Уæрæсейы регионты æмæ æввахс фæсарæнты бæстæты. Уадзæм бадзырдтæ Хъырым æмæ Абхазимæ", — радзырдта организатор.
Фидæн аз та равдыст фæуазæг уыдзæн Адыгеямæ, Майкопмæ, организатортӕ ма райстой цалдæр фæхуынды Европæйæ.
