ЦХИНВАЛ, 19 ноя- Sputnik. Хуссар Ирыстоны райдыдта фӕззыгон ӕрсидт ӕфсадмӕ, фехъусын кодтой Sputnik хъахъхъӕнынады министрады пресс-службӕйы.
Хуссар Ирыстоны гарзджын тыхтӕ конд сты фылдӕр контракт чи бафыста, уыцы ӕфсӕддонтӕй, сидтонтӕ сты уыдонӕн сӕ 15%. Ӕфсады службӕйы ӕмгъуыд у иу аз ӕмӕ ӕрдӕг.
"Ӕфӕсӕддон комиссариат развӕлгъау сбӕлвырд кодта ӕрсиддон кары фӕсивӕды ӕмӕ ныр уыдон цӕуынц медицинон сгӕрст. Фидар ӕнӕниздзинад ӕмӕ физикон цӕттӕдзинад кӕмӕн разына, уыдон рацӕудзысты ӕвзонг æфсæддоны курс ӕмӕ уый фӕстӕ райгуырӕн бӕстӕйы раз ӕххӕст кӕндзысты сӕ хӕс", — загъта уагдоны пресс-секретарь Гуыцмӕзты Галина.
Уый ма банысан кодта, фӕззыгон ӕрсидты æфсæддонтӕн ард бахӕрыны церемони кӕй ацӕудзӕн декабры Цхинвалы Кады аллейыл.
Ӕфсӕддон ӕрсидт цӕуы аз дыууӕ хатт — уалдзӕг ӕмӕ фӕззӕджы.
Хуссар Ирыстоны гарзджын тыхтӕ арӕзт ӕрцыдысты 1990 ӕзты райдайӕны, Гуырдзыстон та радон хатт хӕстон архайдтытӕ куы райдыдта республикӕйы ныхмӕ, уӕд.
