ЦХИНВАЛ, 25 ноя — Sputnik. Хуссар Ирыстоны зæрдæрыстæй сæмбæлдысты уæрæсейаг бомбардировщик Су-24 фехсыны æмæ уæрæсейаг æфсæддонты амарыны хабарыл, загъта президент Тыбылты Леонид.
Бæстæйы сæргълæууæг æртыццæджы фембæлд уæрæсейаг делегацийы уæнгтимæ УФ-йы Æдасдзинады советы секретары хæдивæг Рашид Нургалиевы сæргълæудæй. Уæрæсейаг чиновник дыццæджы æрцыд республикæмæ дыууæбонон кусæгон балцы.
"Уæрæсейы зноны хабæрттæй арвы цæфау фестæм. Туркаг ракетæйæ фехстæуыд уæрæсейаг бомбардировщик Су-24, фæмард сты уæрæсейаг æфсæддон службæгæнджытæ. Ацы æбуалгъ цау дзурæг у ууыл æмæ мах хъуамæ уæм æнгом, æмæ иумæйаг тыхтæй тох кæнæм терроризмимæ", — загъта Тыбылты Леонид.
Фæмардуæвæг æфсæддон службæгæнджыты рухс ном ссардтой иу уысм æдзæмæй алæугæйæ.
Президент банысан кодта, Хуссар Ирыстон разы кæй у Уæрæсейы политикон курсимæ æмæ терроризмы ныхмæ йæ архæйдтытимæ.
"Терроризмы ныхмæ тох у æнæмæнгхъæуæг фæрæз, кæцы здæхт у сабырад æрлæууын кæнынмæ. Æнæмæнгæй хъæуы Интеграци æмæ æмцæдисады фæдыл бадзырд реализаци кæныны тыххæй уæлæмхас бадзырдтыл бакусын, кæцыйы æндæр æмæ æндæр пункттæ агайынц нæ бæстæты æдасдзинады фарстытæ", — банысан кодта президент.
Нургалиев бузныджы ныхæстæ загъта УФ-йы курсимæ разыдзинады тыххæй æмæ банысан кодта, уæрæсейаг Су-24-ы алыварс æрцæугæ цаутæ кæй сты æвдисæн дунейы дывæр стандарттæн.
"Терроризмимæ цы коалици хъуамæ тох кæна, уым ис серьезон хъӕнтӕ. Знон æнæхъæн дуне уыд æвдисæн, ахæм дывæр стандартты тыххæй бирæ фарстытæ кæй не сты коалицийы контролы бын ", — загъта Нургалиев.
Нургалиев банысан кодта, æфсæддон службæгæнджытæ цы мисси æххæст кодтой, уый нысан кæй уыд терроризм æнæхъæн дунейыл ма бауадзын апарахат кæнын. Куыд 2008 азы УФ-йы службæгæнджытæ æххæст кодтой Хуссар Ирыстоны фидауынгæнæн мисси, афтӕ.
"Абон æппæт дуне банкъардта, цы у терроризм. Мах хъуамæ æмбарæм, æрмæстдæр иумæйаг тыхтæй кæй ис фадат рамбулын ацы фыдимæ", — загъта УФ-йы Æдасдзинады советы секретары хæдивæг.
Уый фехъусын кодта, Мæскуыйы уагъд кæй æрцыд сæрмагонд æмбырд, цыран дзырд цыд уæлæмхас бадзырдты фæдыл æнхъарæнтыл. Йæ ныхæстæм гæсгæ, фидаргонд æрцыдысты кусæгон къордтæ æмæ абон кæй хъæуы бацæттæ кæнын бындурон бадзырдмæ уæлæмхас бадзырдты пакет, кæцы æрвыст æрцæудзæн Владимир Путин æмæ Тыбылты Леонидмæ.
