ЦХИНВАЛ, 26 ноя — Sputnik. Цӕгат Кавказы националон театрты VII ӕхсӕнадӕмон фестиваль "Сцена без границ"-ы иууыл хуыздӕр сылгоймаджы фӕлгонцыл банымадтой спектакль "Ныййарӕджы кадӕг"-ы сӕйраг хъайтар Галуанты Людӕйы актерон куыст мады роль ӕххӕст кӕнгӕйӕ, фехъусын кодта Sputnik спектаклы режиссер Дзуццаты Тамерлан.
Галуанты Людӕ — Хуссар Ирыстоны адӕмон артисткӕ, Хъӕрӕсе-Черкесы сгуыхт артисткӕ, поэтессӕ, драматург, зынгӕ ӕхсӕнадон архайӕг.
"Ӕртӕ хатт Хуссар Ирыстоны драмон театры сценӕйыл ӕвӕрд ӕрцыд спектакль "Ныййарӕджы кадӕг" ӕмӕ дзы ныййарӕджы роль алыхатт дӕр ӕххӕст кодтон ӕз, фӕлӕ фыццаг хатт спектаклӕн дӕр ӕмӕ мӕ куыстӕн дӕр ахӕм аргъ скодтой фестивалы. Кӕд фӕнды дӕр адӕймаджы ныфс вӕййы хорзӕхтӕй, фӕлӕ нӕ фӕстӕ ӕвдыст цыдысты ноджы ӕндӕр фидар куыстытӕ ӕмӕ уымӕ гӕсгӕ фидарӕй нӕ зыдтам, нӕ къухы исты хорзӕх бафтдзӕн, ӕви нӕ", — банысан кодта Галуанты Людӕ.
Фестивалы уагӕвӕрдмӕ гӕсгӕ, мадзалы хорзӕхтӕ лӕвӕрд цыдысты ӕхсӕз номинацийы — хуыздӕр спектакль, хуыздӕр нӕлгоймаг ӕмӕ сылгоймаджы фӕлгонцтӕ, хуыздӕр режиссура ӕмӕ ӕндӕртӕ.
Гаглойты Владимиры пьесӕ "Ныййарӕджы кадӕг"-мӕ гӕсгӕ спектакль Хуссар Ирыстоны сценӕйыл сӕвӕрдта режиссер Дзуццаты Тамерлан. Спектаклы ӕвдыст цӕуы Стыр Фыдыбӕстӕйон хӕсты рӕстӕджы ирон бинонты трагикъон хъысмӕт — ныййарӕгӕн йӕ авд фырты хӕсты быдырӕй нал ӕрӕздӕхтысты. Пьесӕйы зӕрдиагӕй райстой Хуссар Ирыстоны театруарзджытӕ, ныр та йын саргъ кодтой фестивалы.
2002 азы Дзуццаты Тамерланӕн йӕ иннӕ куыст — Брытъиаты Елбыздыхъойы пьесӕмӕ гӕсгӕ ӕвӕрд спектакль "Амран" райста фестиваль "Сцена без границ"-ы хорзӕх номинаци "Хуыздӕр режиссура"-йы.
