ЦХИНВАЛ, 26 ноя — Sputnik. Украинæйаг боксер гуырдзиаг мыггагимæ Яго Киладзе нал сразы ирон боксер-профессионал Гасситы Мурæтимæ тох кæнын, фехъусын кодта Sputnik Мурæты тренер Сланты Виталий.
Гасситы Мурæт у дунейон чемпион фӕсивӕды 'хсӕн WBC-йы версимӕ гӕсгӕ, Европӕйы чемпион IBF-йы версимӕ гӕсгӕ, дунейы интерконтиненталон чемпион IBF-йы версимӕ гӕсгӕ.
"Тох Гасситы Мурæт — Яго Киладзе IBF-йы версимæ гæсгæ дунейы чемпионы роны хицау бауыны тыхæй хъуамæ уагъд æрцыдаид 28 ноябры Дюссельдорфы (Герман). Æбæрæг æфсонæй Яго цалдæр боны размæ нал сразы нæ спортсменимæ тох кæнын", — загъта Сланты Виталий.
Ацы тохы уæлахиздзау иста фадат IBF-йы версимæ гæсгæ дунейы чемпионы номы тыххæй стох кæнын ныры чемпион, аргентинæйаг Виктор Эмилио Рамиресимæ.
"Æнхъæлмæ кæсæм, цалдæр бонмæ кæй рабæрæг уыдзæн Мурæты ног ныхмæлæууæг", — банысан кодта тренер.
Цыппаразон профессионалон спортивон карьерæйы мидæг Гасситы Мурæт ауагъта 22 тохы ӕмӕ сӕ алкӕцыйы дӕр ссис уӕлахиздзау, 16 тохы йæ ныхмæлæуджыты арвыста нокауты.
Октябры боксер схызт æртыккаг позицимæ Боксерты æхсæнадæмон федерацийы ранæуæггонд рейтингы, Киладзе та ацы рейтингы ис 14 бынатыл.
