ЦХИНВАЛ, 27 ноя — Sputnik, Плиты Фатимӕ. Цхинвалы бирӕпрофилон колледж ацы аз сӕмбӕлд йӕ фондз азы юбилейыл. Ахуырадон уагдон цыбыр рӕстӕгмӕ ссис нырыккон царды ӕнӕмӕнгхъӕуӕг специалистты цӕттӕгӕнӕн центр. Ам 9-ӕм къласы фӕстӕ, науӕд та скъолайы фӕуды фӕстӕ равзарӕн ис дӕсгай дӕсниӕдтӕй. Колледжы архайы аразӕджы, хуыйӕджы, хӕринагаразӕджы, агрономы ӕмӕ бирӕ ӕндӕр факультеттӕ. Ног ахуыры азӕй ма сӕм ноджы ӕрбафтдзӕн дыууӕ ног факультеты — туризмы ӕмӕ парикмахерон.
Кӕд колледж нырма фондз азӕй фылдӕр нӕ кусы, уӕддӕр ахуырадон уагдонӕн ис дӕргъвӕтин ӕмӕ цымыдисон истори. Колледжы сырӕзты размӕ та ам ӕнтыстджынӕй архайдта хъӕууонхӕдзарадон техникум.
Ардӕм ахуырмӕ ӕрбацӕуынц, сӕ дӕсниӕдтыл ӕцӕгӕй кусынмӕ чи хъавы, уыцы рауагъдонтӕ. Ардӕм фӕсивӕд тырнынц сӕхи дипломтӕй схъал кӕнынмӕ нӕ, фӕлӕ зонындзинӕдтӕ ӕмӕ професси райсынмӕ. Сӕ студентты 70% ссардтой сӕ нысан царды ӕмӕ ӕмрӕстӕджы ахуыр дӕр кӕныц, ӕмӕ равзаргӕ дӕсниадыл кусгӕ дӕр.
"Нӕ студенттӕй 11 къласы фӕстӕ чи ӕрбацыд ахуырмӕ, уыдон ӕмрӕстӕджы кусгӕ дӕр кӕныц сӕ равзаргӕ дӕсниадыл, колледжы исынц практикон ӕмӕ теоретикон зонындзинӕдтӕ дӕр. Мах архайӕм рӕстӕджы ӕмӕ царды домӕнтӕм гӕсгӕ, республикӕ цы специалистты цухдзинадӕй тыхсы, уыцы факультеттӕ бакӕнӕм ахуырады министрады рекомендацимӕ гӕсгӕ", — радзырдта колледжы директоры хӕдивӕг Тыбылты Джульетта.
Афтӕ колледжы фӕзындысты арӕзтады, кафелгӕнӕджы, хӕринагаразӕджы, хуыйӕджы ӕмӕ ӕндӕр дӕсниӕдтӕ. Азӕй-азмӕ ӕнтыстджын цы професситӕ нӕ разынынц, уыдон уагъдоны къухдариуӕгад фӕстӕмӕ сӕхгӕны. Ног ахуыры азмӕ та хъавынц бакӕнын ног факультеттӕ. Ам фӕзындзӕн фадат туризмы фӕдыл зонындзинӕдтӕ райсын ӕмӕ парикмахеры дӕсниад сахуыр кӕнын.
Сӕрыстыр сты ахуыргӕнджытӕ сӕ студентты ӕнтыстытӕй. Студенттӕ канд ахуырмӕ нӕ тырныц, фӕлӕ ма активонӕй сӕхи ӕвдисынц ӕхсӕнадӕмон конкурсты куыд республикӕйы, афтӕ Цӕгат Ирыстоны ӕмӕ Уӕрӕсейы бирӕ горӕтты дӕр.
"Цӕгат Ирыстоны уагъд цӕуӕг конкурс кусӕгон професситы ӕхсӕн "World Skills"-ы ныр цалдӕр азы дӕргъы призон бынӕттӕ бацахсынц нӕ студенттӕ. Автомеханиктӕ, аразджытӕ ӕмӕ хӕринагаразджытӕ ивыгъуыд азты райстой фыццаг, дыккаг ӕмӕ ӕртыккаг бынӕттӕ. Уымӕй дарддӕр ма нӕ фӕсивӕд ирд тӕлмӕнтӕ ныууагъта Уӕрӕсейы горӕтты ӕндӕр конкурсты архайгӕйӕ дӕр", — банысан кодта директоры аннӕ хӕдивӕг Козаты Гульнара.
Райгонд сты коллектив сӕ куысты уавӕртӕй дӕр. Абон Цхинвалы бирӕпрофилон колледж архайы райдзаст ногарӕзт бӕстыхайы. Раздӕры кӕлӕддзаг бӕстыхайы бынаты сырӕзт ног ӕртӕуӕладзыгон агъуыст. Теоретикон ахуыртӕн ис ӕппӕт уавӕртӕ дӕр, фӕлӕ кусӕгон професситы сӕйраг сты практикон ахуыртӕ, уыдонӕн та нӕ фаг кӕнынц æрмадзтӕ. Аразджытӕ сӕ дӕсниадыл цайдагъ кӕныц республикӕйы арӕзтцӕуӕг объекттыл. Уый хыгъд студенттӕ дӕр сӕ хайбавӕрд бахастой спорткомплекс "Олимп"-ы театры ӕмӕ ӕндӕр объектты арӕзтадмӕ.
Колледжы къухдариуӕгад бадзырдтӕ бафыста БТК-4, дзулфыцӕн комбинат, министрӕдттӕ ӕмӕ ӕндӕр уагдӕттимӕ. Сӕрмагондӕй, хуыйӕджы факультет конд ӕрцыд Хуыйӕн фабрикӕйы закъазмӕ гӕсгӕ, фӕлӕ сӕ студенттӕй уырдӕм кусынмӕ бацӕуыны фӕнд ничи кӕны — иууылдӕр сӕ фӕнды суӕвын амалиуӕггӕнджытӕ, сӕрмагонд закъазтӕ исын ӕмӕ сӕ фантазитӕ сӕххӕст кӕнын.
Ныр уал фӕлварынц ирон националон дарӕс хуыйын. Ныридӕгӕн уал сын бантыст сцӕттӕ кӕнын цалдӕр хуызы разгӕмттӕ.
Колледжы ацы ахуыры аз бакодтой хӕринагаразӕг-кондитеры иуазон факультет, цыран фӕсивӕд цайдагъ кӕнынц ирон ӕмӕ дунейы къӕбицты хӕрзад хӕринӕгтӕ аразыныл.
"Хӕринаг аразгӕйӕ, хъусдард здӕхт у аходӕнӕн куыд йӕ адмӕ, афтӕ йӕ хуызмӕ дӕр. Нӕ рауагъдонтӕ кусынц Цхинвалы хуыздӕр ресторанты къӕбицты", — разырдта факультеты ахуыргӕнӕг Цоциты Фатима.
Хъӕууонхӕдзарадон техникум колледжмӕ рацарӕзтой 2010 азы, уӕдӕй фӕстӕмӕ фӕзынд бирӕ ӕвӕрццаг ивындзинӕдтӕ йӕ куысты, фӕфылдӕр ис сӕ студентты нымӕц, фӕхуыздӕр сты сӕ уавӕртӕ, фӕзынд фадӕттӕ ӕхсӕнадӕмон конкурсты хайад исынӕн. Ӕрхуыдтой ног специалисттӕ Уӕрӕсейӕ, кӕцытӕ рӕдауӕй лӕвар кӕнынц сӕ фӕлтӕрддзинад сӕ хъомылгӕнинӕгтӕн.
Афтӕ ма колледжы къухдариуӕгад ӕмӕ студенттӕ стыр хъусдард здахынц Цхинвалы инвалидты ӕмӕ ацӕргӕ адӕмы пансионат "Забота"-йы цӕрджытӕм. Арӕх сын ныххӕссынц сӕхи арӕзт хӕринӕгтӕ, сӕхи хуыд дарӕс, иудзырдӕй, сӕ бон куыд у, афтӕ сын лӕггад кӕнынц.
