ЦХИНВАЛ, 1 дек — Sputnik, Хъотайты Мария. Хуссарирыстойнаг гимнасткæты командæ хайад райсдзæн эстетикон гимнастикæйæ æппæтуæрæсейаг турнир "Оскар"-ы, кæцы уагъд цæудзæн 5-6 декабры Ростовы, загъта Sputnik командæйы тренер Джиоты Медея.
"Нæ аивадон гимнастикæйы командæ 12 спортсменкæйы скондæй фыццаг хатт райсдзысты хайад эстетикон гимнастикæйæ æппæтуæрæсейаг турниры. Уыдон сæхи бирæ цæттæ кодтой ацы эрыстӕм. Фыццаг хатт нын фадат фæцис ахæм егъау турниры нæ арæхстдзинад равдисын, уый размæ мах архайдтам æрмæстдæр республикон ерысты", — загъта тренер.
Транспортон хæрдзтæ йæхимæ райста Хуссар Ирыстоны фæсивæд, спорт æмæ туризмы хъуыддæгты фæдыл комитет.
Ныртæккæ æрыгон чызджытӕ аивадон гимнастикæйыл хæст кæнынц Цхинвалы центры спортивон скъолайы зæронд агъуысты. Кæй зæгъын æй хъæуы, нæй дзы æмбæлон уавæртæ спорты бæрзæндтæм хизынæн. Чысыл хъомылгæнинæгтæ æмæ сæ ныййарджытæ æнæрхъæцæй æнхъæлмæ кæсынц, кæд ацæудзысты сæ ног бынатмæ — Алинайы Кабаевайы ног спортивон комплексмæ. Кæд комплекс официалон æгъдауæй баконд æрцыд октябры, уæддæр уæдæй нырмæ йæ дуæрттæ сты æхгæд.
Фæсивæд, спорт æмæ туризмы хъуыддæгты фæдыл комитеты сæргълæууæг Зассеты Сергей ранымадта аххосæгтæ, кæцытæ цæлхдуртæ æвæрынц спортивон комплексы æххæст куыстæн.
"Спортивон комплекс ныры онг лæвæрд нæма æрцыд нæ комитеты балансмæ. Цæмæй комплекс æххæстæй скуса, уый тыххæй райсын хъæуы техникон персонал, къухдариуæгадон къорд, тренерты æмæ ацы штатæн снысан кæнын куыстмызд. Ацы азы бюджетыл ныфс æвæрæн кæй нал ис, уый тыххæй Алина Кабаевайы спортивон комплексы куыстæн фæрæзтæ æвæрд æрцæудзысты 2016 азы бюджеты", — бамбарын кодта Зассеты Сергей.
Эстетикон гимнастикæйы федераци Ростовы областы йæ куыст райдыдта 2005 азы æмæ у Уæрæсейы иууыл егъаудæр æмæ титулджындæр. 2002 азы Ростовы арæзт æрцыд спортивон клуб "Оскар". Федерацийы сæйраг тренер æмæ президент у Елена Михайлова.
