ЦХИНВАЛ, 3 дек — Sputnik. Магистралон доны хæтæл Едыс — Цхинвалы аварийы фæстиуæгæн хуссарирыстойнаг столицæ аззад æнæ донæй, фехъусын кодтой Sputnik горæты администрацийы пресс-службæйы.
"Доны хæтæл Хуыцъейы хъæуы цур аскъуыд æртыццæджы изæрæй. Ацы фадыджы æрцыд цъыфы зæй, кæцы бахъыгдардта доны хæтæл", — загътой мэрияйы.
Агентады дзырдæмбал банысан кодта, Паддзахадон унитарон кондад "Водоканал"-ы кусджытæ аварийы бынатмæ кæй ацыдысты æвæстиатæй. Фæлæ сын цалцæггæнæн куыстытæм æрæвналын фадат фæцис æрмæстдæр цалдæр сахат фæстæдæр.
"Æхсæвæн йе `рдæг уыдон айгæрстой фæндаг аварийы бынатмæ. Фæндаг æвзæр кæй у, уый тыххæй техникæ рæгмæ бахаудта ацы фадыгмæ", — загътой администрацийы пресс-службæйы.
Цалцæггæнæн бригадæ куыста æнæхъæн æхсæв, цалынмæ аварийы фæстиуджытæ нæ аиуварс кодта. Ныртæккæ Цхинвалы нæй донæй ифтонгад. Ацы проблемæ аскъуыддзаг кæнын ныфс æвæрынц цыппæрæмы изæрмæ,"дон горæтмæ цæуын райдайдзæн 21.00".
