ЦХИНВАЛ, 4 дек — Sputnik. Хуссарирыстойнаг курдиатджын скъоладзаутӕ сӕ арӕхстдзинад бафӕлвардзысты республикон фестиваль "Театралон дæсниад"-ы, фехъусын кодтой РХИ фæсивæдон политикæ, спорт æмæ туризмы комитеты пресс-службӕйы.
Мадзал райдайдзӕн хуыцаубоны, 6 декабры зынгӕ прозаик, критик, поэт Джусойты Нафийы 90 азы юбилейы цытӕн. Президент Тыбылты Леониды барамындмӕ гӕсгӕ, Хуссар Ирыстоны ацы аз расидт ӕрцыд Джусойты Нафийы азӕй.
"Фестивалы нысан у сбæрæг кæнын курдиаджын фæсивæд, рӕзгӕ фӕлтӕрты культурæйыл фæцайдагъ кæнын ӕмӕ сын мадæлон æвзагмæ ӕмӕ ирон фысджытæм уарзондзинад сæвзæрын кæнын", — банысан кодта комитеты пресс-секретарь Софа Исаакян.
Скъоладзаутӕ сӕ курдиат бӕрӕг кӕндзысты 10 номинацийы — хуыздæр пьесӕ, сылгоймаджы ӕмӕ нæлгоймаджы хуыздӕр фӕлгонцтӕ, хуыздæр дарæс, сценографи ӕмӕ ӕндӕртӕ.
"Фестивалы уагӕвӕрдмӕ гӕсгӕ, пьесӕ ӕвӕрд хъуамӕ ӕрцӕуа ирон ӕвзагыл ӕмӕ цӕуа 30 минуты", — бафтыдта пресс-секретарь.
Мадзал уагъд цӕуы фæсивæдон политикæ, спорт æмæ туризмы комитет æмæ ахуырады министрады хъæппæрисæй Хетагкаты Къостайы номыл паддзахадон драмон театры труппӕйы æххуысæй.
