ЦХИНВАЛ, 9 дек — Sputnik. Тыхæй ма спайда кæныны тыххæй документыл бакуыст у женеваг дискусситы сæйраг хæслæвæрд, фехъусын кодтой Sputnik Фæсконфликтон уавæр æрбиноныг кæныны фæдыл Хуссар Ирыстоны президенты æххæстбарджын минæвары аппараты.
Женевæйы уагъд цæуы Фæскавказы стабилондзинад æмæ æдасдзинады фарстаты фæдыл æхсæнадæмон дискусситы радон раунд. Бадзырдты хайадисджытæ бакусдзысты Фæскавказы тыхæй ма спайда кæныны тыххæй документыл, афтæ ма æруынаффæ кæндзысты гуманитарон фарстатыл.
"Хуссар Ирыстоны делегаци дыццæджы ауагъта дыууæварсон консультацитæ Женеваг дискусситы æмсæрдæрттимæ. Хуссар Ирыстон ма ауагъта æртæварсон консультацитæ дискусситы уæрæсейаг æмæ абхазаг хайадисджытимæ", — фехъусын кодтой пресс-службæйы.
Женевæйы ма æруынаффæ кæндзысты гуманитарон фарстатыл, уый нымæцы Хуссар Ирыстоны æбæрæгæй сæфт æмбæстæгты хъысмæт сбæрæг кæныныл, афтæ ма республикæйы æмбæстæгтæй Гуырдзыстоны ахæстæтты чи бады, уыдон хъысмæтыл.
Женевӕйы дискусситӕ уагъд цӕуынц 2008 азы октябрӕй Уӕрӕсе ӕмӕ Францы президентты бадзырдтӕм гӕсгӕ. Уыдоны ӕмбарадон бындурыл хайад исынц Хуссар Ирыстон, Абхаз, Гуырдзыстон, Уӕрӕсе, АИШ, афтӕ ма Евроцӕдис, ОБСЕ ӕмӕ Иугонд нациты организацийы минӕвӕрттӕ.
