ЦХИНВАЛ, 14 дек — Sputnik. Хуссарирыстойнаг командæ "16 + г. Цхинвал" æнтыстджынæй йæхи равдыста æвзæрстон фестивалы æмæ ахызт Хъæлдзæг æмæ цыргъзонд фæсивæды клубы Æппæтуæрæсейаг Юниор-Лигæйы æрдæгфиналмæ.
Фестиваль уагъд цыд мæскуыйаг фæсивæдон центр "Планета КВН"-ы 8-12 декабры. Фестивалы фæстæ командæйы хайадисджыты фæхуыдтой Хуссар Ирыстоны минæварадмæ УФ-йы.
Минæварады сайт куыд хъусын кæны, афтæмæй "ныхасы рæстæджы хуссарирыстойнаг минæвар Гасситы Знауыр раарфæ кодта командæйы хайадисджытæн æнтыстджынæй сæхи кæй равдыстой, йæ зæрдæ сын загъта ноджыдæр стыр æнтыстытæ æмæ сын президент Тыбылты Леониды номæй радта æхцайы премитæ, цæмæй сæ арæхстдзинад ноджыдæр цыргъ кæной æмæ æхсæнадæмон турнирты сæ къухты æфтой æнтыстытæ".
Хуссар Ирыстоны командæ "16 плюс, г. Цхинвал" рагæй зонгæ у алкæмæндæр, 2013-2014 сезоны уый ссис Æппæтуæрæсейаг Юниор-Лигæйы финалист æмæ 80 хайадисæг командӕты æхсæн бацахста æртыккаг бынат. Ацы сезоны командæйæн ис ранæуæггонд сконд, уымæ гæсгæ уыдонæн ацы фестиваль ссис фыццаг ахæм масштабы. Уымæ æнæкæсгæйæ, жюри банымадта командæйы цæттæдзинады æмвæзад бæрзондыл æмæ сын радта фадат сæхи равдисын Æппæтуæрæсейаг Юниор-Лигæйы æрдæгфиналы.
