ЦХИНВАЛ, 16 дек — Sputnik. РХИ æмæ УФ культурæйы министрæдтæ бафыстой æмгуыстады программæ æввахс цыппар азмæ. Документы бын сæ къухтæ бафыстой дыууæ ведомствойы сæргълæуджытæ Остъаты Мадинæ æмæ Владимир Мединский, хъусын кæны республикæйы культурæйы министрады пресс-службæ.
РХИ-ы культурæйы министрад хайад иста IV Æхæнадæмон Санкт-Петербургаг культурон форумы, цæй фæлгæтты бафыст æрцыд ацы документ.
"Ацы программæ у уæлæмхасæн æмцæдисад æмæ интеграцийы фæдыл бадзырдмæ. Министртæ ма бафыстой фидæн азмæ мадзæлтты нывæзт дæр. Ацы æмгуыстад суыдзæн Хуссар Ирыстоны культурæйы къабазы алыварсон райрæзты æмæ дыууæ адæмы традицион культурон бастдзинæдтæ сфидар кæныны ахсджиаг фактор",- загътой пресс-службæйы.
Программæйы фæлгæтты хусарирыстойнаг специалисттæ сæ дæсниад бæрзонддæр кæндзысты уæрæсейаг уæлдæр ахуыргæнæндæтты, хуссарирыстойнаг аивадон коллективтæ хайад исдзысты Уæрæсейы культурон мадзæлтты, специалисттæ иумæйагæй кусдзысты культурон бынты цыртдзæвæнтæ бахъахъхъæныны къабазы, арæзт цæудзысты хуссарирыстойнаг нывгæнджыты равдысттæ УФ-йы æндæр æмæ æндæр регионты.
