ЦХИНВАЛ, 16 дек — Sputnik. Ахуырады министрады хъӕппӕрисӕй Цхинвалы цыппӕрӕмы ацӕудзӕн зонадон-практикон конференци "Ирыстоны истори, ирон адӕмы традицион культурӕ, ног цӕстӕнгас актуалон проблемӕтӕм", фехъусын кодта Sputnik министрады националон ахуырады хайады сӕйраг специалист Гаглойты Бэла.
Мадзалы Хуссар Ирыстоны паддзахадон университеты ӕмӕ зонад-иртасӕн институты кусджытӕ бакӕсдзысты докладтӕ Ирыстоны истори ӕмӕ культурӕйы фӕдыл. Конференци райдайдзӕн цыппӕрӕмы, цыппар сахатыл.
"Ӕдӕппӕтӕй мадзалы бакӕсдзысты авд доклады. Конференцийы рӕстӕджы ма ахуыргӕнджытӕн фадат уыдзӕн цымыдисгӕнӕг фарстыты фӕдыл райсын дзуаппытӕ Ирыстоны номдзыд ахуыргӕндтӕй. Уымӕй дарддӕр ма уынаффӕ цӕудзӕн скъолатӕн рекомендацигонд уӕлӕмхас методикон литературӕйы фӕдыл", — загъта Гаглойты Бэла.
Йӕ ныхӕстӕм гӕсгӕ, конференцийы рӕстӕджы ныхас цӕудзӕн чындзӕхсӕв ӕмӕ зианы ӕгъдӕуттӕ ӕххӕст кӕныны раззагон фӕрӕзтыл дӕр.
Конференцийы организатор у Ахуырады министрад.
