ЦХИНВАЛ, 17 дек — Sputnik, Козаты Диана. Ног азы бӕрӕгбонмӕ ма баззад бынтон цъус рӕстӕг ӕмӕ бирӕ бинонтӕ ӕвзарынц наз бӕлас. Иутӕ тырнынц удӕгас наз бӕлас сфӕлындзынмӕ, иннӕтӕ та ӕрдзмӕ сӕ аудгӕ ахаст ӕвдисынц ӕмӕ балхӕнынц аразгӕ бӕлӕстӕ.
Наз бӕлӕсты базартӕ Хуссар Ирыстоны скусдзысты ӕрмӕстдӕр 20 декабры. Горӕты чысыл базары раз уынгыл амалиуӕгӕнджытӕ равӕрынц сӕ хъулон-мулон цатыртӕ ӕмӕ ӕгас уынг сфӕлындынц аразӕгӕ наз бӕлӕстӕ ӕмӕ бирӕ цӕхӕркалгӕ хъазӕнтӕй. Аразгӕ наз бӕласы аргъ йӕ бӕрзӕндмӕ гӕсгӕ вӕййы 500 сомӕй 5-6 мины онг.
"Ӕз сӕвӕрдтон наз бӕлас ӕмӕ йӕ срӕсугъд кодтон хъазӕнтӕй. Ӕцӕг наз бӕлас, кӕй зӕгъын ӕй хъӕуы, рӕсугъддӕр у, стӕй ма йӕ тӕфӕй дӕр зӕрдӕ райы, фӕлӕ мын бӕрӕгбоны фӕстӕ зын вӕййы бӕлас ӕппарын, уымӕ гӕсгӕ сӕвӕрдтон аразгӕ наз. Алы аз дӕр бирӕ наз ныццӕгъдынц ног азмӕ ӕмӕ тӕригъӕд сты", — загъта Sputnik Цхинвалы цӕрӕг Плиты Ирина.
Скъоладзау Куымӕридтаты Русикӕн ис цӕхгӕр ныхмӕлӕуд хъуыды, уымӕн ӕрвылаз дӕр йӕ ныййарджытӕ балхӕнынц удӕгас наз бӕлас. Ӕвзаргӕ дӕр ӕмӕ йӕ рӕсугъд дӕр скӕны йӕхӕдӕг, стӕй ма ӕрвылаз дӕр ӕлхӕны ног хъазӕнтӕ йӕ наз бӕласӕн.
"Мӕ зӕрдӕмӕ нӕ цӕуынц аразгӕ наз бӕлӕстӕ. Раздӕр-иу мӕ фыдимӕ нӕхӕдӕг ацыдыстӕм ӕмӕ иу нӕ хъӕуы ракодтам бӕлас, еныр та йӕ ӕвзарӕм базары. Уарзын ногазон заз бӕлас фӕлындын, хаттӕй-хатт мӕм мӕ мад дӕр фӕкӕсы", — дзуры уый.
Наз бӕлӕстӕ ракӕныны хъуыддаг хауы Хъӕды хӕдзарады управленимӕ, уыдонӕй хъӕуы бар райсын бӕлӕстӕ лыг кӕнын тыххӕй дӕр.
Уагдоны хистӕр Чилӕхсаты Таймураз куыд фехъусын кодта Sputnik, афтӕмӕй ӕрвылаз дӕр Хуссар Ирыстоны ралыг кӕнынц 800-1000 метры бӕлас, ацы аз дӕр та, планмӕ гӕсгӕ, уыдзӕн афтӕ.
"Куыстмӕ бавналдзыстӕм ӕрбалӕугӕ къуыри. Ацы рӕстӕг хъахъхъӕд цӕудзысты трассӕтӕ дӕр, цӕмӕй ӕнӕфарстӕй, ӕнӕмбӕлгӕ бынаты ма ныццӕгъдой нӕзытӕ. Калд цӕуынц стыр наз бӕлӕстӕ, кӕцытӕн сӕ зӕнджы хъӕдӕрмӕг дӕр бӕззы спайда кӕнынӕн", — загъта Чилӕхсаты Таймураз.
Фылдӕр бӕрцӕй наз бӕлас ласынц Дзауы районӕй.
Чилӕхсаты Таймуразы ныхӕстӕм гӕсгӕ, горӕты администраци рахицӕн кодта бынат наз бӕлӕстӕ уӕй кӕнынӕн. Ногазон наз бӕлӕсы базар уыдзӕн Харебаты Исахъы ӕмӕ Октябры уынгтӕ кӕм иу кӕнынц, уым. Йӕ иу метры аргъ уыдзӕн 250 сомы.
Наз бӕлӕстӕ уӕй кӕныны нысанӕн кӕй фӕнды ракалын, уыдоны хъӕуы саразын бадзырдтӕ Хъӕды хӕдзарады управлениимӕ. Ӕнӕ барӕй наз бӕлӕстӕ чи ралыг кӕна, уыдон цӕудзысты ивар. Иу бӕлас сын слӕудзӕн йӕ аргъӕй 20 хатты фылдӕр.
