ЦХИНВАЛ, 28 дек — Sputnik. Арæнгæрон зонæйы фæстаг æртæ боны дӕргъы уæрæсейаг арæнхъахъхъæнджытæ æрцахстой æртæ гуырдзыстойнаг æмбæстаджы, фехъусын кодтой Sputnik Паддзахадон æдасдзинады комитеты (ПӔК) пресс-службæйы.
"Фæдагуырды рæстæджы рабæрæг, уыдон æнæзакъонæй кæй рахызтысты Хуссар Ирыстоны паддзахадон арæныл уадзæн пунктты иувæрсты. Арæнсæтджыты æрцахстой Ленингоры районы Цхилоны хъæуы цур. Уыдон сты Гуырдзыстоны æмбæстæгтæ — Мцхетаг районы цæрджытæ", — загътой ведомствӕйы.
Басгæрсты фæстæ æрцахстуæвæг гоймæгты фæдыл æрмæджытæ лæвæрд æрцæудзысты тæрхондонмæ. Административон ивар бафидыны фæстæ уыдоны феддæдуар кæндзысты республикӕйӕ.
