ЦХИНВАЛ, 31 дек — Sputnik. Къуаисайы эксплуатацимӕ лӕвӕрд ӕрцыд скъолайы ног бӕстыхай. Йӕ бакӕныны цытджын церемони ацыд республикӕйы къухдариуӕгады хайадистӕй.
"20 азӕй фылдӕр ахуыргӕнджытӕ ӕмӕ скъоладзаутӕ фыдӕбон кодтой, ахуырӕн чи нӕ бӕззыд, ахӕм хатӕнты. Абон райстам ног бӕстыхай, кӕцы дзуапп дӕтты ӕппӕт домӕнтӕн дӕр скъола", — загъта президент Тыбылты Леонид.
Ног скъола ссис стыр ногазон лӕвар Къуыдаргомы цӕрджытӕн. Скъолайы раздӕры бӕстыхай ныппырх ис ивгъуыд ӕнусы 90-ӕм азты зӕххӕнкъуысты рӕстӕджы. Уӕдӕй фӕстӕмӕ сывӕллӕттӕ ахуыр кодтой вагӕтты, кӕцыты рацарӕзтой кълӕстӕм. Зымӕгон рӕстӕджы уроктыл бадтысты сӕ хъарм уӕлӕдарӕсы, вагӕтты уазал кӕй уыд, уый тыххӕй.
Сӕ мӕгуырау уавӕрты аххосагӕй-иу сын нӕ уыд цытджын линейкӕтӕ ӕмӕ рӕсугъд рауагъдон балтӕ дӕр.
Ныридӕгӕн ахуырдзаутӕ ӕмӕ ахургӕнджытӕ ногазон улӕфтытӕй тынгдӕр ӕнхъӕлмӕ кӕсынц ахуыры райдайӕнмӕ, цӕмӕй бацӕуой ногарӕзт райдзаст хатӕнтӕм. Ныр сын ис фадат физикон культурӕйы уроктӕ сӕрмагонд спортивон залы уадзынӕн, информатикӕ та сӕрмагонд компьютерон къласы ӕмӕ афтӕ дарддӕр.
Бӕстыхай нымад у 176 ахуырдзауыл. Къуаисайы ныртӕккӕ ахуыр кӕны 121 скъоладзау.
