ЦХИНВАЛ, 11 янв — Sputnik. Хуссар Ирыстоны арӕнхъахъхъӕнджытӕ 4 ӕмӕ 5 январы ӕрцахстой Гуырдзыстоны дыууӕ ӕмбӕстаджы паддзахадон арӕн фехалыны тыххӕй, фехъусын кодтой паддзахадон ӕдасдзинады комитеты (ПӔК) пресс-службӕйы.
Фӕткхалджыты ӕрцахстой паддзахадон арӕныл Цхинвалы районы хъӕутӕ Гром ӕмӕ Присмӕ хӕстӕг.
"Уыдон сты Гуры районы Бершуеты хъӕу ӕмӕ горӕт Тбилисы 1996 ӕмӕ 1975 ӕзты гуырд цӕрджытӕ. Ныридӕгӕн паддзахадон ӕдасдзинады комитеты арӕнхъахъхъӕнджытӕ уадзынц фӕдагурӕн куыстытӕ, ӕрмӕджытӕ цӕттӕ цӕуынц тӕрхондонмӕ адӕттынмӕ", — радзырдтой уагдоны.
Пресс-службӕйы кусджытӕ ма банысан кодтой, 25-28 декабры цы гуырдзыстойнаг ӕмбӕстӕгты ӕрцахстой, уыдон ивар бафидыны фӕстӕ кӕй ӕрцыдысты сӕрибар.
Ӕдӕппӕтӕй ивгъуыд аз Хуссар Ирыстоны паддзахадон арӕн фехалыны тыххӕй ахст ӕрцыд 265 адӕймаджы. Фылдӕр бӕрцӕй арӕн фехалыны цаутӕ ӕрцыдысты Цхинвалы районы.
