ЦХИНВАЛ, 12 янв — Sputnik. Системæ "Æдас горæт" сæвæрыны фæстæ Хуссар Ирыстоны фæндæгтыл цæхгæр фæуæлдæр уыдзæн æдасдзинады æмвæзад, загъта мидхъуыддæгты министр Лæууойты Æхсар республикæйы президент Тыбылты Леонидмæ æмбырды рæстæджы.
Сабаты Хуссар Ирыстоны фæндагон-транспортон цауы фæстиуæгæн фæмард республикæйы генералон прокурор Цгъойты Мераб. Президент бахæс кодта Мидхъуыддæгты министрæн, цæмæй райсой мадзæлттæ фæндæгтыл æдасдзинады æмвæзад фæуæлдæр кæныны фæдыл.
"Республикæмæ Уæрæсейæ æрцæудзæн специалистты къорд, кæцы райдайдзæн кусын системæ "Æдас горæт" ныффиддар кæныныл. Уый фæахъаз уыдзæн уавæр рараст кæнынæн. Æвæрд æрцæудзысты 50 цæстдарыны фадыджы, кæцытæ нысан кæндзысты фæндагон змæлды уагæвæрд", — æрхаста Мидхъуыддæгты министрады сæргълæууæджы ныхæстæ президенты пресс-секретарь Гана Яновская.
Йæ ныхæстæм гæсгæ, Тыбылты Леонид бахаста æнхъарæн фæндагон змæлды æдасдзинад сифтонг кæныны фæдыл профилактикон куыстмæ аздахын æхсæнады æмæ Хуссар Ирыстоны политикон партиты хъусдард.
