ЦХИНВАЛ, 13 янв — Sputnik. Мӕскуыйы Стыр Фыдыбӕстӕйон хӕсты мемориалон комплексы "Кады Залы" ӕвӕрд ӕрцӕудзӕн ирон хъӕбатыр, Советон цӕдисы дыууӕ хатты хъайтар, Монголы адӕмон республикӕйы хъайтар Плиты Иссӕйы цырт, хъусын кӕны газет "Слово".
Ирыстоны ӕфсӕддон элитӕйы иууыл ирддӕр минӕвар Плиты Иссӕйы бронзӕйон бюст ссардзӕн йӕ бынат Уӕрӕсе ӕмӕ Советон Цӕдисы хъайтарты ӕхсӕн "Кады Залы".
"Стыр Фыдыбӕстӕйон музейы мраморон фӕйнӕджытыл фыст ӕрцыдысты Советон Цӕдис ӕмӕ Уӕрӕсейы 12 мин хъайтары ном, уыдон ӕхсӕн ирӕттӕ дӕр. Хӕсты ирон хъайтартӕй Плиты Иссӕ уыдзӕн фыццаг адӕймаг, кӕцыйӕн сӕвӕрдзысты бюст "Кады Залы", — дзырдӕуы хъусинаджы.
Нысаниуӕгджын бонмӕ уагъд ӕрцӕудзӕн майдан хъайтары хуызистимӕ "Фыдыбӕстӕйы хъайтар — Плиты Иссӕ Александры фырт".
