ЦХИНВАЛ, 13 янв — Sputnik. Паддзахадон драмон театры труппӕ ӕвзонг режиссер Ян Яновскийы сӕргълӕудӕй цӕттӕ кӕнынц Фернандо Аррабалы уацмыс «Фандо и Лис»-мӕ гӕсгӕ спектакль, фехъусын кодта Sputnik спектаклы режиссер.
Уацмыс ирон ӕвзагмӕ раивта Хуссар Ирыстоны сгуыхт артист Бибылты Сослан, уый ӕххӕст кӕны сӕйраг фӕлгонцтӕй сӕ иу.
"Уацмысы ӕвдыст цӕуы сылгоймаг ӕмӕ нӕлгоймаджы ахастытӕ. Фандо ӕмӕ Лис агурынц дзӕнӕты цард. Фӕндагыл ӕмбӕлынц стыр фыдӕбӕттыл ӕмӕ кӕроны Фандо мары Лисы. Трагедийы нӕ равдисын фӕнды дзӕнӕт агурыны ӕнӕхъуаджыдзинад", — загъта Ян Яновский.
Режиссеры ныхӕстӕм гӕсгӕ, ацы тема актуалон у Хуссар Ирыстонӕн дӕр, ома бирӕ адӕм сӕ проблемӕтӕ аскъуыддзаг кӕныныл нӕ архайынц, фӕлӕ сӕ зындзинӕдты азым кӕныц ӕндӕрты.
Пьесӕйы сӕйраг фӕлгонцтӕ ӕххӕст кӕнынц Бибылты Сослан ӕмӕ Натия Чохели, афтӕ ма Тъехты Василий, Харебаты Жан-Жак ӕмӕ Куымӕридтаты Батрадз.
Спектакль ӕвӕрд цӕуы Хуссар Ирыстоны президенты финасон ӕххуысы фӕрцы.
Ян Яновский ахуыр кӕны Щукины номыл театралон ахуыргӕнӕндоны режиссеры дӕсныйадыл. "Фандо и Лис" у йӕ фыццаг спектакль Хуссар Ирыстоны паддзахадон драмон театры сценӕйыл.
