ЦХИНВАЛ, 13 янв — Sputnik. Дзӕуджыхъӕуы рухсмӕ фӕзынд зынгӕ ирон фыссӕг, поэт, драматург ӕмӕ тӕлмацгӕнӕг Джыгкайты Шамилы чиныг "Ӕвзӕрст уацмыстӕ", хъусын кӕны газет "Северная Осетия".
Джыгкайты Шамил уыд Иры раззагон интеллигенцийы ирддӕр минӕвӕрттӕй сӕ иу. Фыссӕджы йе ‘сфӕлдыстадон куысты тыххӕй фыдгӕнджытӕ амардтой 2011 азы 26 майы — уый фыста Беслӕны теракты организатортӕ ӕмӕ радикалон пысылмон диныл хӕст фыдгӕнджыты ныхмӕ.
"Рауагъды ӕмбырдгӕнӕг Хуыгаты Сергей чиныгмӕ бахаста фыссӕджы хуыздӕр ӕмдзӕвгӕтӕ, поэмӕтӕ, зонадон ӕмӕ этнографион куыстытӕ, афтӕ ма тӕлмац уацмыстӕ дӕр", — дзырдӕуы хъусинаджы.
Чиныджы разныхас бацӕттӕ кодтой фыссӕджы коллегӕтӕ Ходы Камал ӕмӕ Хуыгаты Сергей. Ӕмбырдгонд мыхуыры рацыд рауагъдад "Ир"-ы.
Ирыстоны адӕмон поэт райгуырд 25 февралы 1940 азы Хуссар Иры, Дзауы районы Дзомагъы. Ӕмдзӕвгӕтӕ фыссын райдыта 9-ӕм къласӕй фӕстӕмӕ. Джыгкайты Шамилӕн кӕнинаг бирӕ баззад. Рацыд ын ӕмдзӕвгӕты ӕхсӕз ӕмбырдгонды ӕмӕ ӕртӕ пьесӕйы.
2009 азы Джыгкайты Шамилы ӕмдзӕвгӕтӕй сӕ иу сӕвзӕрын кодта стыр скандал ӕмӕ йыл Цӕгат Ирыстоны пысылмон дины управлени ныффыста хъаст прокуратурӕмӕ, фӕлӕ сгарӕн куыстытӕ ницӕмӕ ӕркодтой.
