ЦХИНВАЛ, 20 янв — Sputnik. Хуссар Ирыстоны дарддæр агурынц уӕрӕсейаг солдаты, кæцы ивгъуыд къуыри фесæфт ахуырадон полигонæй. Æрвылбондæр 4 æфсæддон базæйы службæгæнджытæ сгарынц Цхинвал æмæ йæ алфамблай, фæрсынц бынæттон цæрджыты. Сæфт солдаты ссарыныл архайынц республикæйы барадхъахъхъæнæн органты кусджытæ æмæ арæнхъахъхъæнджытæ дæр.
Дыццæджы Цхинвалмæ æрцыд фесæфæг солдаты фыд Владимир Зацепилин. Телекомпани "Ир"-ы эфиры уый æрсидт бынæттон цæрджытæм, цæмæй йын баххуыс кæной йæ фырты ссарыны хъуыддаджы.
"Курæг дæн, цæмæй бæлвырд информаци кæмæ ис мæ лæппуйы бынаты фæдыл, уый бадзура ахæм номыртыл 8 929 804 97 22. Виктор, лæгъстæ дын кæнын, фехъусын нын кæн, кæм дæ. Дæ мад йæхицæн бынат нал уары. Тынг дæм æнхъæлмæ кæсæм", — загъта уый.
Службæгæнæджы къамтæ конд сты æнæхъæн горæты, йæ бынат базоныны тыххæй бæлвырд информаци чи фехъусын кæна, уымæн лæвæрд æрцæудзæн 150 мин сомы.
19-аздзыд Виктор Иванов уæрæсейаг æфсæддон базæйы службæ кæнынмæ æрцыд Омскæй.
