ЦХИНВАЛ, 26 янв — Sputnik. Хуссар Ирыстоны скъолаты кафты коллективтӕ сӕ арӕхстдзинад равдисдзысты ӕппӕтреспубликон хореографийы фестивалы, фехъусын кодта Sputnik РХИ ахуырады министрады минӕвар Джиоты Эльза.
Фестиваль цӕудзӕн 28-29 январы, хайад дзы исдзысты кафты коллективтӕ республикӕйы алы къуымтӕй.
"Фестивалы фыццаг бон уыдзӕн конкурсон программӕ Колыты Аксойы номыл аивӕдты лицейы. Дыккаг бон та "Чермен"-ы уагъд ӕрцӕудзӕн уӕлахиздзауты гала-концерт", — банысан кодта Джиоты Эльза.
Уый ма радзырдта, скъоладзауты архайдӕн кӕй аргъ кӕндзысты республикӕйы зынгӕ хореографтӕ.
Хореографийы фестиваль Цхинвалы уагъд цӕуы ныр ӕртыккӕгӕм аз. Ахуырады министрады монон-фӕткӕвӕрдон нывӕзты фӕлгӕтты скъолаты арӕзт ӕрцыдысты ирон кафты къордтӕ, бахуыдтой сын националон дарӕс дӕр. Ацы къордты куыстӕн ӕрвылаз дӕр саргъ кӕнынц фестивалты.
