ЦХИНВАЛ, 28 янв — Sputnik. Цхинвалы байгом ирон националон кафты фестиваль скъоладзауты ӕхсӕн, мадзал ӕрӕмбырд кодта 300 ахуырдзауы республикӕйы алы къуымтӕй.
Фестиваль конд ӕрцыд боны дыккаг ӕмбисы Колыты Аксойы номыл аивӕдты лицейы. Конкурсмӕ уыйбӕрц адӕм ӕрбацыд ӕмӕ дзы бирӕтӕн бынат дӕр нӕ разынд.
Фестивалы иууыл арӕхстджындӕр къорды ном райсыныл тох кӕнынц 16 коллективы. Симд, хонгӕ, сиргӕ ӕмӕ ӕндӕр аив кафтытӕ ивынц кӕрӕдзи сценӕйыл. Иу къордӕй аннӕмӕн рӕсугъдӕр дарӕс ӕмӕ хуыздӕр цӕттӕ сывӕллӕттӕ.
"Азӕй азмӕ бӕрзонддӕр кӕны ӕвзонг кафджыты цӕттӕдзинад ӕмӕ сӕ уагахаст. Фестиваль канд кафтмӕ нӕ разӕнгард кӕны, фӕлӕ ма скъоладзаутӕн дӕтты монон хъомылад дӕр", — загъта Sputnik ахуырады министрады минӕвар Джиоты Эльза.
Мадзалы хайад исынц 6-16 азы кары фӕсивӕд. Ӕвзонг кафджыты арӕхстдзинадӕн аргъ кӕнынц Хуссар Ирыстоны нымад хореографтӕ.
Цхинвалы ӕртыккӕгӕм скъолайы коллектив бацӕттӕ кодта хонгӕ кафт ӕмӕ кӕд сӕйрагыл нымайынц хайад райсын, уӕддӕр сӕ уӕлахизы ныфс дӕр ис.
"Амӕй размӕ та архайдтам зарды конкурсы, фӕлӕ призон бынат нӕ бацахстам. Ныр кафты конкурсмӕ нӕхи цӕттӕ кӕнӕм бирӕ рӕстӕг ӕмӕ бӕллӕм, сом нӕ гала-концерты сӕйраг приз кӕй фӕуыдзӕн, уымӕ", — загъта 3-ӕм скъолайы ахуырдзау Пухаты Дауыт.
Фестивалы аккагдӕр коллективтӕ хорзӕхджын ӕрцӕудзысты майрӕмбоны конкурсы гала-концерты рӕстӕджы ПККЗ "Чермены".
Кафты фестиваль Хуссар Иры цӕуы ныр ӕртыккаг аз, азӕй-азмӕ фылдӕр кӕны хайадисджыты нымӕц ӕмӕ профессионалон ӕмвӕзад.
