ЦХИНВАЛ, 29 янв — Sputnik. Цхинвалы 5-ӕм ӕмӕ Дзауы скъолатӕ ссисты ирон националон кафты фестивалы уӕлахиздзаутӕ. Жюрийы уӕнгтыл ацы дыууӕ коллектив афтӕ арф тӕлмӕнтӕ ныууагътой, ӕмӕ дыууӕтӕн дӕр радтой фыццаг бынӕттӕ.
Уӕлахиздзаутӕ фӕбӕрӕг сты майрӕмбоны, фестивалы гала-концерты рӕстӕджы.
Фӕндзӕм скъолайы коллектив "Аланты фӕндонтӕ" ныр дыккаг хатт ссис ацы фестивалы уӕлахиздзау. Гала-концерт дӕр бакодта ацы къорд националон кафт симдӕй, сценӕмӕ ракодтой 15 къайы.
Конкурсы дыккаг бынат адих кодтой Цхинвалы фыццӕгӕм скъола ӕмӕ скъола-интернат, афтӕ ма призерты нымӕц баххӕст кодта Дменисы скъолайы кафты коллектив.
Кӕд фӕндзӕм скъолайы ӕвзонг кафджытӕ сӕ ӕнтыстытыл ахуыр сты, уӕд Дменисы скъолайы ахуырдзаутӕ та фыццаг хатт райстой республикон ӕмвӕзады фестивалы призон бынат. Аст чысыл лӕппуйы хӕххон кафтӕн жюри радта ӕртыккаг бынат.
"Бӕргӕ фыццаг банат ноджы хуыздӕр у, фӕлӕ уал нын ацы аз ӕрыккаг дӕр фаг у. Фыццаг хатт стӕм ацы фестивалы. Иннӕ азмӕ та ноджы фӕлтӕрддӕрӕй ӕрбацӕудзыстӕм ӕмӕ уӕд бацархайдзыстӕм уӕлахиздзаутӕ суӕвыныл", — радзырдта Sputnik чысыл кафӕг Джиголаты Марат.
Фестивалы хайад райстой 300 ахуырдзауы республикӕйы алы къуымтӕй. Иууыл арӕхстджындӕр къорды ном райсыныл тох кодтой 16 коллективы. Ӕвзонг кафджыты арӕхстдзинадӕн аргъ кодтой Хуссар Ирыстоны нымад хореографтӕ.
