ЦХИНВАЛ, 2 фев — Sputnik, Козаты Диана. Хуссар Ирыстоны Уӕлвӕткон уавӕрты (УУМ) министрады зынгхуыссынгӕнджытӕ тох кӕнынц завод "Электровибромашина"-йы цехтӕй сӕ иуы зынгсирвӕзты ныхмӕ. Ӕвирхъау хабары тыххӕй сигнал УУМ минӕвӕрттӕ райстой изӕры фондз сахатмӕ ӕввахс.
Зынгхуыссынгӕнджытӕ уайтагъддӕр рацыдысты бӕллӕхы бынатмӕ, фӕлӕ куыд рабӕрӕг, афтӕмӕй иу къорд нӕ фӕтых уыдаид артыл. Ӕххуысмӕ ӕрбацыдысты ноджы дыууӕ машинӕйы.
Ирвӕзынгӕнджыты архайдмӕ ӕнӕкӕсгӕйӕ, кӕлӕддзаг цех иууылдӕр басыгъд, фӕлӕ уӕддӕр нал бауагътой арт заводы иннӕ территорийыл апырх кӕнын.
Зынгсирвӕзты рӕстӕджы зиан ничи баййӕфта. Заводы директор Бестауты Тамаз фехъусын кодта Sputnik, цех кӕй нӕ уыд кусӕгон.
