ЦХИНВАЛ, 8 фев — Sputnik. Цхинвалмӕ гастролты ӕрцыд ихыл цирк "Северное сияние" Волгоградӕй, артисттӕ дыууӕ боны дӕргъы ирхӕфсдзысты хуссарирыстойнаг сабиты, фехъусын кодта цирчы къухдариуӕггӕнӕг Павел Сурков.
Равдыстытӕ райдыдтой къуырисӕры. Сырдты ӕркӕныны фадат нӕ фӕцис — нӕ сӕ рауагътой арӕны сӕрты, фӕлӕ, уымӕ ӕнӕкӕсгӕйӕ, циркмӕ ӕрбацӕуын афтӕ бирӕ сабиты фӕнды, ӕмӕ артистты бахъуыд уӕлӕмхас ралӕудтӕ бафтауын.
"Мах фыццаг хатт не ‘рцыдыстӕм Цхинвалмӕ, уымӕ гӕсгӕ йӕ зыдтам, нӕ сырдты нын арӕны сӕртыл кӕй не ‘руадздзысты ӕмӕ бацӕттӕ кодтам сӕрмагонд нывӕзт, цӕмӕй сабитӕн хъӕлдзӕг ӕмӕ цымыдисон равдыст фенын кӕнӕм. Сценӕйыл кусынц авд адӕймаджы, сабитӕ ныл сӕмбӕлдысты тынг райдзастӕй", — загъта Павел Сурков.
Ихыл цирк "Северное сияние" Цхивалмӕ ӕрцыд ныр ӕртыккаг хатт. Ивгъуыд гастролты семӕ ӕркодтой стай, кӕфхъуындар, уызын, маймули ӕмӕ ӕндӕр сырдты, фӕлӕ сын арӕныл хизыны рӕстӕджы сӕвзӕрд проблемӕтӕ — сырдты фӕстӕмӕ нал уагътой. Уымӕ гӕсгӕ ныр ӕрцыдысты ӕрмӕст артисттӕ.
