ЦХИНВАЛ, 17 фев — Sputnik. Дӕс хъазтмæ дисквалификаци, кæцы æнхъæлмæ кæсы мæскуыйаг "Локомотив"-ы æрдæгхъахъхъæнæг Дмитрий Тарасовмæ Уæрæсейы президент Владимир Путины къамимæ майкæ равдисыны тыххæй, у æгæр карз æфхæрд, загъта Хуссар Ирыстоны парламенты депутат, раздæр та зынгæ уæрæсейаг футболист Тедеты Бахва.
Дыццæджы "Локомотив" — "Фенербахче" фембæлды фæстæ Тарасов раласта йæ футболон майкæ, цæй бын разынд Путины къамимæ футболкæ æмæ фыст "иууыл уæздан президент". УЕФА-йы фехъусын кодтой, футболист кæй æрцæудзæн дисквалификаци бирæ рæстæгмæ — 10 матчы.
"Ацы мадзал у æгæр карз æфхæрд ахæм æнæхъинцъ мийы тыххæй. Ницы дзы ис азымаг, Тарасов йæ президенты "æвварс" кæй у. Уый æппындæр политикæимæ æмæ пропагандæимæ баст нæу", — загъта Бахва.
Тарасовы архæйдтытæ хауынц УЕФА-йы дисциплинарон регламенты 14-æм статьямæ, кæцымæ гæсгæ тобæгонд сты "динон, политикон æмæ идеологион пропагандæйы хуызтæ иууылдæр".
