ЦХИНВАЛ, 29 фев — Sputnik. Криминалон милицийы кусджытӕ Цхинвалы районы Уанаты хъӕуы ӕдзӕрӕг хӕдзары ссардтой 45-аздзыд сылгоймаджы мард буар, фехъусын кодтой мидхъуыддӕгты министрады пресс-службӕйы.
"Цхинвалы мидхъуыддӕгты управленимӕ ивгъуыд къуыри ӕрбацыд Таджикистаны ӕмбӕстаг, кӕцы рӕстӕгмӕ цӕры Хуссар Иры ӕмӕ фехъусын кодта, йӕ зонгӕ сылгоймаг кӕй фесӕфт", — радзырдтой пресс-службӕйы.
Оперативон-фӕдагурӕн мадзӕлтты рӕстӕджы криминалон милицийы кусджытӕ Уанаты ӕрдӕгпырх хӕдзӕрттӕй сӕ иуы ссардтой сылгоймаджы мард буар. Уый разынд Эльдаева Луиза Мусайы чызг, Цӕцӕны Республикӕйы Урус-Мартаны районы цӕрӕг.
Сылгоймаджы амӕлӕты фӕдыл бакондӕуыд уголовон хъуыддаг. Милицийы кусджытӕ ныридӕгӕн сбӕлвырд кодтой ацы хабары дызӕрдыггаг адӕмы. Республикӕйы Генералон прокуратурӕ уадзы оперативон-фӕдагурӕн мадзӕлттӕ сылгоймаджы амӕлӕты аххосаг базоныны тыххӕй, кӕцыйӕн бындур ӕрӕвӕрдзысты экспертты хатдзӕгтӕ ӕмӕ оперативон ӕрмӕджытӕ.
