ЦХИНВАЛ, 29 фев — Sputnik, Козаты Дианæ. Цалдæр хуссарирыстойнаг уагдоны минæвæрттæ цы кусæгон къорды скондмæ бацыдысты, уый бакусдзæн фæсивæдон политикæйы фæдыл паддзахадон программæйыл.
Цхинвалы къуырисæры уагъд æрцыд фембæлд фæсивæдон политикæ, спорт æмæ туризмы фæдыл комитеты, ӕнæниздзинад хъахъхъæныны ӕмӕ культурæйы министрӕдты минæвæртты, студентты, парламенты депутатты, æхсæнадон фæсивæдон организациты минæвæртты хайадистæй. Фембæлдмӕ ма ӕрбацыд вице-премьер Пухаты Эрик.
Мадзалы "аххосаг" ссис президенты ныстуан парламент æмæ адæммæ, цыран Тыбылты Леонид стыр хъусдард аздæхта фæсивæдон политикæйы проблемæтæм.
Пухаты Эрикы ныхæстæм гæсгæ, кусæгон къорд бакусдзæн æппæт æнхъарæнтыл, кæцытæ раразмæ кæндзысты фæсивæд, æхсæнадон æрганизацитæ æмæ республикæйы ведомствӕтæ.
"Ног программæмæ, кæцы райст æрцæудзæн 2016-2020 азтæн, хаст æрцæудзысты монон хъомылады программæйы пункттæ, кæцытæ не ‘рцыдысты реализаци. Ацы прграммæйæн дæр уыд йæхи æвæрццаг нысан", — загъта вице-премьер.
Йæ нымадмæ гæсгæ, ног документы стыр хъусдард аздахын бахъæудзæн хъæуты цæрæг фæсивæдмæ, уымæн æмæ "столицæйы бакæнгæ куыст алыхаттдæр зыны".
Депутат Бесаты Зитæ банысан кодта, программæйыл бакусынмæ æрæвналыны размæ бæлвырд кӕй хъуамæ æрцæуой, фæсивæды архайды цавӕр сæйраг здæхтытæ æмæ проблемæтæ скъуыддзаг хъуамæ æрцæуой, уыдон.
"Ис нæм проблемæтæ æмæ сыл хъæуы дзурын. Ис наркомани, проституци. Хъуамæ нæ хъусдард аздахæм скъоладзауты моралон бакастмæ, хъуамæ сæ æфтауæм ирæтты националон традицитæ æмæ культурæйыл — æгъдау, кæй фæхонæм, ууыл. Ис тынг бирæ здæхтытæ, алкæцымæ дæр дзы хъæуы æркæсын æмæ программæ саразын рæстагæй", — загъта уый.
Фæсивæдон политикæ, спорт æмæ туризмы фæдыл комитеты минæвар Хъуылымбегты Александр банысан кодта, абоны онг алы ведомствӕ дæр фæсивæды проблемæтæ кæй скъуыддзаг кодта "йæхирдыгонау", кусæгон къорды нысан та у алы уагдоны архайдтытæ дӕр скоординаци кæнын æмæ æмгуыст кæнын.
Йæ нымадмæ гæсгæ, ног программæйы бындур хъуамæ суа фæсивæды монон æмæ патриотикон хъомылад, историкон-культурон хæзнатимæ зонгæ кæнын, уæлæмхас ахуырад, сфæлдыстадон фæсивæд æмæ фæсивæдон амалиуæгадæн æххуыс, спорты райрæзт.
Пухаты Эрик ма загъта, цæмæй документы нысан æрцæуа æрыгон поэттæ æмæ фысджытæн æххуыс кæныны пункт.
Программæйы проектыл бакусын æмæ бацæттæ кæнынæн лæвæрд æрцыд дыууæкъуырион æмгъуыд, уый фæстæ хъуамæ бавдыст æрцæуа хицауад æмæ парламентмæ.
