Хуссар Иры паддзахадон архивыл ӕххӕст кӕны 90 азы

© Sputnik / Руслан ТадтаевРХИ паддзахадон архив
РХИ паддзахадон архив - Sputnik Хуссар Ирыстон
Рафыссын
Æрвылаз дӕр Уæрæсейы 10 марты нысан цæуы Архивты бон. Хуссар Ирыстоны архивы кусджытæ сæ профессионалон бæрæгбон нысан кæнынц 24 июны. Ацы аз паддзахадон архивыл сæххæст уыдзæн 90 азы.

ЦХИНВАЛ, 10 мар — Sputnik. Хуссар Ирыстоны паддзахадон архивыл ацы аз сæххæст уыдзæн 90 азы. Уый сырæзт 1926 азы 24 июны. Ацы периоды паддзахадон архив уыд æндæр æмæ æндæр ведомствӕты, уыдон нымæцы Мидхъуыддæгты министрады, зонадон-иртасæн институты дæлбар.

Советон дуджы архивы бæлвырд æмгъуыд цы документтæн аивгъуыдта, уыдон Хуссар Ирæй æрвыстой Гуырдзыстоны ССР- ы паддзахадон архивмæ. ССРЦ ныппырхы фæстæ ардыгæй æрвыст документтæ иууылдæр баззадысты уым. Уымæ гæсгæ иууыл нысаниуæгджындæр (революциагъоммæ периоды) документтæм абон нæй бавналыны фадат нæ историографийæн, хуссарирыстойнаг архивы та æвæрд сты, сæйраджыдæр советон периоды æрмæджытæ.

Фæлæ се ‘хсæн разыны цымыдисон документтæ. Абоны бон архивы æвæрд сты алыгъуызон æрмæджытæ: æндæр æмæ æндæр æзты Хуссар Ирыстоны газеттæ æмæ журнæлттæ, сомихаг æвзагыл аргъуанон-метрикон чингуытæ. Сæ мидис æнæзонгæ у, уымæн æмæ документтæ тæлмац не сты, не рцыд бæрæг, цы азы уагъд сты, уый дæр.

© Sputnik / Руслан ТадтаевХуссар Ирыстоны паддзахадон архив
Здание Государственного архива РЮО - Sputnik Хуссар Ирыстон
Хуссар Ирыстоны паддзахадон архив

Хуссар Иры паддзахадон архивы фадат ис базонгæ кæнын Сæйраг кавказаг рагъы уылты инженер-аразæг Гаглойты Рутены арæзт фæндаг æмæ тоннелы проектимæ. Уый æрæвæрдта бындур ацы арæзтады фæндагæн, кæцыйæн Стыр Фыдыбæстæйон хæсты рæстæджы уыд ахсджиаг нысаниуæг немыцаг æфсад ныппырх кæныны хъуыддаджы Алагиры цур.

Паддзахадон архивон управленийы сæргълæууæг Тадтаты Ревазы ныхæстæм гæсгæ, ахсджиаг архивон документтæ хъахъхъæд цæуынц æххæст бæрцæй. Се ‘мгъуыд куы аивгъуыйы (5 — 25 азы), уæд паддзахадон уагдæттæ сæ документтæ арвитынц архивмæ. Ам рацæуынц экспертизæ, бавæрынц сæ папкæты æмæ сæ арвитынц æвæрæнмæ.

"Республикæйы хицауад 2012 азы Централон паддзахадон архивæн рахицæн кодтой фæрæзтæ архивон къоппытæ балхæнынæн. Нæ кусджытæ ма бакодтой уæззау куыст — ныссыгъдæг кодтой документтæ рыгæй, бафснайдтой сæ. Рафæлгъау ма кодтой реставраци цы документтæ домынц, уыдон", — радзырдта управленийы сæргълæууæг.

Иууыл рагондæр архивон æрмæджытæ домынц реставраци, кæцы уадзынц паддзахадон архивы цур лабораторийы. Специалисттæ-реставраторты хъуагдзинады тыххæй куыстытæ цæуынц цадæггай.

© Sputnik / Руслан ТадтаевКусджытæ бакодтой уæззау куыст - ныссыгъдæг кодтой документтæ рыгæй, бафснайдтой сæ
Сотрудница государственного архива РЮО - Sputnik Хуссар Ирыстон
Кусджытæ бакодтой уæззау куыст - ныссыгъдæг кодтой документтæ рыгæй, бафснайдтой сæ

Уæрæсе рахицæн кодта лимиттæ Мæскуыйаг паддзахадон историко-архивон институтмæ, кæцымæ ничи цæуы ахуырмæ.

"Хорз уаид, нæ абитуриенттæй иутæ сæ ных куы скæниккой архивон кусæджы профессимæ, уымæн æмæ у тынг цымыдисон. Архивон службæйы цы 24 азы кусын, уый дæргъы æз фембæлдтæн алыгъуызон документтимæ, кæцытæ хъахъхъæнынц нæ истори", — загъта паддзахадон архивы сæргълæууæг Уалыты Валентинæ.

Ныртæккæ архив у йемыдзаг документтæй. Проблемæйы скъуыддзаг домы финансон хæрдзтæ. Уымæ гæсгæ паддзахадон архивы кусджытæ бахатыдысты æххуысы фæдыл республикæйы хицауадмæ. Курдиатмæ нырма цæуы æркаст.

Ног хабӕртты лентӕ
0