ЦХИНВАЛ, 15 мар — Sputnik, Плиты Фатимӕ. Паддзахадон ансамбль "Симд"-ы ног историйы иууыл ӕвзонгдӕр солист Санахъоты Инал Хуссар Ирыстоны сгуыхт артисты ном райста 23 азы кары. Ирон кафты дӕснытӕ Иналы барынц Ирыстоны иууыл номдзыддӕр кафӕг Плиты Нодаримӕ.
Ӕвзонг солистӕн сценӕмӕ йӕ алкӕцы рахызтыл дӕр адӕм ӕмбӕлынц къухӕмдзӕгъдӕй. Уымӕн иттӕг хорз уайы симд ӕмӕ хонгӕйы руаджы ирон кафты уӕздандзинад ӕмӕ фыдӕлты удварн радӕттын.
Инал ахӕм ӕвзонгӕй хуымӕтӕджы не ‘ссис ансамблы солист — йе ‘нтыстытӕ сты канд курдиат, физикон цӕттӕдзинад ӕмӕ ӕвзыгъддзинады нӕ, фӕлӕ ма ӕппынӕдзух удуӕлдай куысты фӕстиуӕг. Ӕмӕ йын кӕд райдианы кафтмӕ серьезон ахаст нӕ уыд, уӕддӕр ӕй фӕстагмӕ йӕ уд афтӕ банкъардта, ӕмӕ ныр йӕ цард нал уыны ӕнӕ симд, хонгӕ, хӕххон ӕмӕ ӕндӕр кӕфтытӕй.
"Чысылӕй фылдӕр спорты ‘рдӕм уыдтӕн здӕхт, уарзтон тынг волейбол, ныр дӕр дзы хъазын. Кафынмӕ мӕ чысылӕй бакодта мӕ мад, фӕлӕ-иу ӕй арӕх ныууагътон — афӕлмӕцыдтӕн-иу дзы. Иу рӕстӕджы бынтондӕр сфӕнд кодтон йӕ ферох кӕнын, фӕлӕ мӕ мӕ дада стыр буц уыд ӕмӕ та уый ӕфсӕрмӕй фӕстӕмӕ бацыдтӕн", — мысы йӕ дӕсниады равзӕрст кафӕг.
Спорт ӕмӕ аивадимӕ сӕ фидӕн сбӕттыны фӕнд чи кӕны, уыдон сӕхи цӕттӕ райдайынц фондз азы карӕй, фӕлӕ, куыд фӕдзурынц, æнæ уæлвæтк фæткæвæрд нæй — Санахъоты Инал паддзахадон ансамбльмӕ ӕрбацыд 16-аздзыдӕй.
Йӕ коллегӕты ныхӕстӕм гӕсгӕ, ӕвзонг лӕппуйӕ ахӕм кафӕг рацӕудзӕн, ууыл хъуыды дӕр ничи акодтаид. Фӕлӕ курдиат ӕмӕ куыст алкӕцы хъуыддаджы дӕр ӕркӕнынц ӕнтыстытӕм. Афтӕ рауад Иналы хъысмӕты дӕр.
"Ницӕмӕй хицӕн кодта аннӕ ӕнӕбары кафджытӕй. Фыццаг ӕм йӕ хъус ӕрдардта ансамблы уӕды солист Ахболты Алан ӕмӕ сӕрмагондӕй йемӕ кусын райдыдта. Уӕдӕй фӕстӕмӕ цӕхгӕр фӕивта. Райсом-иу ӕй бынаты сыййӕфтам хидӕйдзагӕй ӕмӕ-иу ӕй изӕры репетицийы фӕстӕ дӕр ныууагътам уым", — радзырдта Sputnik ансамблы кафӕг Зӕринӕ.
Историкты бӕлвырдгӕнӕнтӕм гӕсгӕ, ирон адӕмы рагфыдӕлтӕ — алантӕ уыдысты бӕрзонд ӕмӕ бурхил, ахӕм у Иналы ӕддаг бакаст дӕр. Уымӕ гӕсгӕ иттӕг хорз сфидыдта Симды солистӕй.
"Иналы æмиуад кӕнынц курдиат, фӕлтӕрддзинад ӕмӕ къӕйныхдзинад. Ис ын стыр фидӕн. Ныртӕккӕ дӕр йӕ хоныц Цӕгат Кавказы бирӕ ансамбльтӕм, фӕлӕ никуыдӕм разы кӕны ацӕуын", — дзуры йе ‘мкусӕг, Абхазы сгуыхт артисткӕ Плиты Ландӕ.
Йӕ уарзондӕр кафт Инал хоны симд, уый фӕстӕ та хонгӕ. Йӕ разы ӕвӕры бирӕ хӕстӕ, ӕмбары, нырма йын аразинаг бирӕ кӕй ис, кӕд ахӕм ӕвзонгӕй бӕрзонд ӕмвӕзадмӕ схызт, уӕддӕр.
"Фӕстагмӕ тынгдӕр бауарзтон ирон кафт, банкъардтон ын йӕ нысаниуӕг, йӕ сусӕгдзинӕдтӕ. Абон кӕд симды солист дӕн, уӕддӕр зӕгъӕн нӕй, ӕмӕ схызтӕн мӕ профессийы иууыл бӕрзонддӕр къӕпхӕнмӕ. Алы кафт, алы фездæхт дӕр гӕнӕн ис ӕмӕ саразай аивдӕр ӕмӕ рӕсугъддӕр. Уымӕ гӕсгӕ мын аразинаг бирӕ ис", — балхынцъ кодта Инал.
