ЦХИНВАЛ, 16 мар — Sputnik. Хуссар Ирыстоны паддзахадон телерадиокомпани ӕртыццӕджы нысан кӕны йӕ бындурӕвӕрды бон — 22 азы размӕ 16 марты телеуынынады кусджытӕ фыццаг хатт рахызтысты эфиры.
Телеуынынад арӕзт ӕрцыд фӕсхӕст рӕстӕджыты (1994 азы), коллективӕн кӕд нӕ уыд хуымӕтӕджы уавӕртӕ, техникӕ, уӕддӕр сын сӕ энтузиазм ӕмӕ патриотизмы фӕрцы ӕнтыст къуыри ӕртӕ хатты эфиры хизын.
Уӕдӕй нырмӕ паддзахадон телеуынынад сарӕзта стыр къахдзӕфтӕ размӕ, рауӕрӕх ис сӕ техникон ифтонггарз, коллективы сконд баххӕст кодтой ног курдиатджын журналисттӕ.
"Абон сӕумӕрайсомӕй нӕ коллективӕн ис бӕрӕгбонон зæрдæйы уаг, фӕлӕ, уымӕ ӕнӕкӕсгӕйӕ, куыст цӕуы ӕрвылбонон режимы. Райсомӕй нӕм ӕрбацыд президент Тыбылты Леонид, раарфӕ нын кодта ӕмӕ кусджыты иу къорды се ‘нтыстджын архайды тыххӕй схорзӕхджын кодта паддзахадон хорзӕхтӕй", — радзырдта Sputnik ПТРК директор Зӕгъойты Рада.
"Ир"-ы сконды ис телеуынынад ӕмӕ радио, ис ын йӕхи сӕрмагонд сайттӕ дӕр. Техникон фӕрӕзтӕ фадат дӕттынц информацион рауагъдтӕ ӕмӕ ӕндӕр алӕвӕрдтӕ комкоммӕ эфиры уадзынӕн.
