ЦХИНВАЛ, 21 мар — Sputnik. Бæгъиаты суаруадзæн завод уадзы Хуссар Ирыстоны иууыл популярондæр нозт — минералон дон "Бæгъиатæ". Æввахс рæстæджы куыстуат хъавы йæ ассортимент фæуæрæхдæр кæнынмӕ. Уарзон "Бæгъиатæ" æмæ "Дзау"-æй дарддæр ам райдайдзысты кулертæн суадоны дон æвгты уадзын, уаддзысты ма йæ æрдæг- æмæ фондзлитрон æвгты.
"Ныридæгæн райдыдтам суадоны дон уадзын. Сарæзтам бадзырд хуыйæн фабрикæ БТК-4-имæ, уадзæм бадзырдтæ алыгъуызон организацитимæ, цæмæй сæ ифтонг кæнæм нуазыны донæй", — загъта Sputnik куыстуаты гендиректор Тедеты Роланд.
Рауæрæхгонд ассортимент æрдомдта кондады модернизаци — æрæджы эксплуатацимæ цы хахх радтой, уый сахаты мидæг уадзы 6 мин авджы — раздæримæ абаргæйæ дыууæ хатты фылдæр.
2015 азы куыстуат райдыдта минералон дон Уӕрӕсемæ экспортмæ æрвитын. Ныртæккæ уый уæрæсейаг базарадмæ æрвиты йæ продукцийы азон гуырахсты 32%.
"Боны мидæг завод уадзы 20 мин авджы бæрц минералон дон. Иу хай дзы ласæм нæ оптон дуканимæ Цхинвалы, иннæ хай та æрвитæм республикæйы æддæмæ — Дзæуджыхъæу, Мæскуы æмæ Хъырыммæ", — загъта директор.
Фæнды йæ заводы кондадон гуырахст фæфылдæр кæнын — ноджы ма иу хахх балхæнын. Уымæн бахъæудзæн бирæ хæрдзтæ, фæлæ фæахъаз уыдзæн кондадон процесс фæхуыздæр кæнынæн.
Тедеты Роланд куыд загъта, афтæмæй завод минералон дон уадзы 0,5 æмæ 1,5 литрон æвгты. Хахх æрмæстдæр иу кæй у, уый тыххæй æндæр гуырахст дон уадзынæн æрлæууын кæнынц цикл æмæ рацаразынц кондад.
"Уый домы бирæ рæстæг, хæссы нын хæрдзтæ æмæ зынвадæттæ", — банысан кодта директор.
Заводмæ дон цæуы, æрдæгкилометр дæрддзæфæй 150 метр æрфæн цъассæй. Цъассæй дон комкоммæ цæуы заводы резервуартæм, уырдыгæй та æвгтыкæнæн хахмæ.
Суардон ныккæнынц æвгты. Æвгтæ хаххыл бацæуынц авотматмæ, кæцы сыл æндадзы этикеткæтæ.
Кæронбæттæны лазерон датææвæрæг сæвæры авгыл датæ, нывæрынц сæ æхсæзгай æвгтæй æмæ сæ ахæм хуызы арвитынц фæлхасгæнæгимæ фембæлдмæ.
