ЦХИНВАЛ, 21 мар — Sputnik. Цæгат Ирыстоны экологион уавæр нымад æрцыд Уæрæсейы регионтæй иууыл æвзæрдæртæй сæ иуыл, цæгаткавказаг республикæ ис экорейтингы кæрон, хъусын кæны æхсæнадон организаци "Зеленый патруль".
Цæгат Иримæ иу рæнхъыл сты Свердловы, Челябинскы, Ленинграды, Мæскуыйы, Тулæйы областтæ, Ханты-Мансийаг зылд, Дзуттæгты автономон область, Якути æмæ Оренбургаг область.
Рейтингы фыццаг бынатыл та сты Республикæ Алтай, Тамбовы æмæ Белгороды областтæ.
"2015-2016 азы зымæджы фæстиуджытæм гæсгæ серьезон ивындзинæдтæ не ‘рцыд. Зымæг экологион æгъдауæй разынд сабыр", — загъта "Зеленый патруль"-ы æрдзхъахъхъæнæн программæты директор Роман Пукалов.
Цæгат Ирыстоны цæрджытæ арæх уадзынц алыгъуызон акцитæ завод "Электроцинк"-ы сыхгæныны домæнимæ, кæцы хæссы серьезон экологион тас. Бирæ рæстæджы дæргъы Цæгат Ирыстон Цæгаткавказаг федералон зылды ахсы раззагон бынат онкологион низтæй рынчынты нымæцы, цæй аххосæг у уый дæр, æмæ завод æрвылбон уæлдæфмæ кӕй æппары бирæбæрц хъæстæ буарадтæ.
Цæгат Ирыстоны къухдариуæгады минæвæрттæ æрæджы фехъусын кодтой, завод хаст кæй æрцæудзæн æндæр бынатмæ. Ивгъуыд декабры хицауады сæрдар Битарты Вячеслав бынæттон радио "Алания"-ы комкоммæ эфиры фехъусын кодта, завод "Электроцинк" республикæйы территорийæ хаст кæй æрцæудзæн æндæр регионмæ.
