ЦХИНВАЛ, 23 мар — Sputnik. Хуссар æфсæддон зылды (ХÆЗ) зенитон ракетон бригадæйы дæлхæйттæ ауагътой командон-штабон ахуыртæ Цæгат Ирыстоны территорийыл, фехъусын кодта дыццæджы ХÆЗ-ы пресс-службæ.
"Республикæ Цæгат Ирыстон — Аланийы кæронмæ бахæццæ сты командон-штабон ахуыртæ ХÆЗ-ы зенитон ракетон бригадæйы дæлхæйттимæ, кæцытæ дислокацигонд сты Дзæуджыхъæуы. Ахуырты хайад райстой 250 æфсæддон службæгæнæджы æмæ æфсæддон техникæйы 100 иуæджы, уыдон нымæцы зенитон ракетон комплекс "Бук-М-1" æмæ штурмон авиацийы хæдтæхджытæ Су-25СМ", — хъусын кæны ХÆЗ.
Дæлхæйдты сыстын кодтой фæдисы æмæ сæ ‘ркодтой уæлдæргонд хотыхджын цæттæдзинадмæ. Командон-штабон ахуырты рæстæджы уыдон сарæзтой 60-километрон марш-бросок снысангонд районмæ, цыран бакуыстой æфсæддон архæйдтытæ уадзын æмæ цæттæ кæныны фарстытыл.
"Къуырийы дæргъы зенитчиктæ бакуыстой басгæрсты практикон фæлтæрддзинадыл. Знаджы уæлдæфон æрбабырсты мадзæлттæ имитаци кодтой штурмон авиацийы хæдтæхджытæ Су-25СМ", — загътой ХÆЗ-ы.
Ахуырты спайда кодтой æфсæддон къухдариуæгадон пунктæй, нырыккон командон-штабон машинæтæй, кæцытæ автоматизацигонд режимы дæттынц фадат скъуыддзаг кæнын бирæ хæслæвæрдтæ, уый нымæцы æфсæддон сигналты райст, бакуыст æмæ равдыст.
