ЦХИНВАЛ, 25 мар — Sputnik. Лауызгӕнӕнтӕ — мӕрдты мысӕн бонтӕ — нысан кӕнынц Стыр Комдарӕны 2, 3 ӕмӕ 4 сабатты. Майрӕмбоны фӕссихор ӕмӕ сабаты райсомӕй аргъуанты уагъд ӕрцӕудзысты мӕрдты мысӕн скуывдтытӕ, фехъусын кодта Sputnik Алайнаг епархийы динамонӕг, фыд Иаков.
Ацы стырбон ирон адӕм нысан кӕныц рагзамантӕй фӕстӕмӕ. Майрӕмбоны изӕры сӕ мӕрдтӕн рухсгӕнинаг фынгмӕ зианджын бинонтӕ цӕттӕ кодтой лауызтӕ, хъӕдур ӕмӕ дзӕрна.
"Дзуары къӕлиндармӕ гӕсгӕ сабат райдайы майрӕмбоны 4 сахатӕй фӕстӕмӕ, уымӕ гӕсгӕ Лауызгӕнӕнтӕ дӕр райдайынц майрӕмбоны изӕрӕй. Адӕм ӕрбахӕссынц аргъуанмӕ арфӕтӕ кӕнынмӕ лауызтӕ, дзӕрна, дыргътӕ, халсӕрттӕ ӕмӕ дон", — радзырдта Фыд Иаков.
Уый банысан кодта, аргъуанмӕ кӕй нӕй гӕнӕн ӕрбахӕссын нозт, фыдызгъӕл, урсаджы хӕринӕгтӕ ӕмӕ алыхуызон адджинӕгтӕ.
"Гӕнӕн ис, ӕмӕ се ‘нусон бӕстӕм чи аивгъуыдта, уыдон дзуарӕфтыд нӕмттӕ гӕххӕтыл фыстӕй ныууадзын, цӕмӕй сӕ сауджынтӕ сӕ скуывдтыты ӕрымысой", — загъта динамонӕг.
Афтӕ ма, фыд Иаковы ныхӕстӕм гӕсгӕ, йӕ зӕххон царды дзуарӕфтыд чи нӕ райста, уыцы адӕмы номыл та Лауызгӕнӕнты фыццаг ӕмӕ дыккаг къуырийы ‘хсӕн ацӕудзӕн хицӕн мысӕн литурги.
Лауызгӕнӕнтӕ ирон ӕдӕммӕ рагӕй фӕстӕмӕ сты стыр бонтӕ. Вӕййынц ӕртӕ, ӕрвылаз дӕр сӕ фӕнысан кӕнынц Стыр комдарӕны дыккаг, ӕртыккаг ӕмӕ цыппӕрӕм сабатбонты. Лауызгӕнӕтӕ ирон адӕммӕ нымад сты мӕрдты боныл, уӕд зианджын бинонтӕ рухс фӕзӕгъынц сӕ мӕрдтӕн. Лауызтӕй дарддӕр ма рухсгӕнинаг фынгыл вӕййынц мӕнӕуы ӕмӕ нартхоры дзӕрнатӕ дӕр.
