ЦХИНВАЛ, 30 мар — Sputnik. Федералон æдасдзинады службæ (ФÆС) æмæ мидхъуыддæгты министрады оперативон кусджытæ ссардтой егъау парти зындгонд фæсарæйнаг æмæ уæрæсейаг маркæты бын контрафактон нозт горæт Мæздæджы æфтауцон бæстыхайы, фехъусын кодтой Sputnik ФÆС-ы регионалон управленийы.
"Горæт Мæздæджы, уынг Первомайскаяйыл æфтауцон бæстыхай басгаргæйæ, оперативон кусджытæ ссардтой 13 мин авджы контрафактон алкоголон продукци алыгъуызон зындгонд фæсарæйнаг æмæ уæрæсейаг брендты бын", — фехъусын кодта управленийы минæвар.
Йæ ныхæстæм гæсгæ, ацы нозтимæ æвгтæ фыццаг бакастæй æппындæр ницæмæй хицæн кæнынц оригиналтæй, æрмæст сыл нæй сæрмагонд акцизон маркæтæ.
Ныртæккæ скъуыддзаг цæуы ацы факты фæдыл уголовон хъуыддаг бакæныны фарст. Слестгæнæн органтæ хъуамæ сбæрæг кæной контрафакты хицæутты, йæ равзæрд, афтæ ма йæ дарддæры реализацийы каналтæ дæр.
