ЦХИНВАЛ, 31 мар — Sputnik. Хуссарирыстойнаг сывӕллӕтты футболон командӕ "Барс-Алан" ссис Дагомысы цӕуӕг ӕхсӕнадӕмон турниры уӕлахиздзау, фехъусын кодта Sputnik командӕйы тренер Хъазиты Алан.
Турниры фӕлгӕтты цхинвайлаг командӕйӕн уыд ӕхсӕз фембӕлды ӕмӕ дзы алкӕцы фембӕлдӕй дӕр рахызтысты уӕлахизимӕ.
"Нӕ фӕсивӕд ӕмӕ Краснодары командӕ "Кубань" тох кодтой фыццаг бынатыл. Финалон хъазт фӕцис 1:0 хыгъдӕй. Матчы хъысмӕт аскъуыддзаг кодта цхинвайлаг командӕйы хъазӕг Тедеты Александр", — радзырдта тренер Хъазиты Алан.
Ӕдӕппӕтӕй турниры архайдта 20 командӕйы бӕрц Уӕрӕсейы регионтӕй, Абхаз ӕмӕ Хуссар Ирыстонӕй.
Футболон командӕ "Барс-Алан"-ы цӕттӕ кӕнынц тренертӕ Хъазиты Алан ӕмӕ Кокойты Юрий. Ӕхсӕнадӕмон турнирмӕ цхинвайлаг командӕ ацыд РХИ фӕсивӕдон политикӕ, спорт ӕмӕ туризмы комитеты ӕмархайдӕй ӕмӕ президент Тыбылты Леонид финасон ӕххуысӕй.
