ЦХИНВАЛ, 31 мар — Sputnik. Хуссар Ирыстонӕн 2016 азы Уӕрӕсейы ӕрдыгӕй финасон ӕххуыс ахиздзӕн 8 миллиард сомӕй, фехъусын кодта Уӕрӕсейы президент Владимир Путин йӕ хуссарирыстойнаг коллегӕ Тыбылты Леонидимӕ фембӕлды рӕстӕджы.
"Зонут ӕй, Уӕрӕсе 2008 азӕй фӕстӕмӕ ӕххуыс кӕны республикӕйӕн, ацы аз, мӕнмӕ гӕсгӕ, рахицӕн ӕрцӕудзӕн 8,2 миллиард сомы бӕрц, уыдонӕй 3,6 миллиард — Инвестицион нывӕзты фӕрӕзты хай", — загъта Владимир Путин.
Уый ма зӕрдыл ӕрлӕууын кодта, ацы нывӕзты фӕлгӕтты арӕзт кӕй цӕудзысты цӕрӕн хӕдзӕрттӕ, паддзахадон театр ӕмӕ рынчындоны комплекс сывӕллӕтты хайадимӕ.
"Иумӕйагӕй сисгӕйӕ, фарстытӕ скъуыддзаг цӕуынц, размӕ цӕуынц", — банысан кодта президент.
Владимр Путин ӕрдзырдта ӕхсӕнадӕмон фадыджы ӕмгуыстадыл, уый ӕмрӕнхъ Женевӕйы бадзырдон форматыл дӕр.
Президент ма банысан кодта, дыууӕ бӕстӕйы ‘хсӕн ахастытӕ фидар кӕй цӕуынц, ӕмӕ "уый хауы ӕмгуыстады ӕппӕт къабазтӕм дӕр".
"Ӕцӕг, зӕгъын хъӕуы, экономикӕйы фадыджы иумӕйаг уавӕр хынцгӕйӕ, базарадон-экономикон бастдзинӕдтӕ фӕлӕмӕгъ сты, ӕнӕуый дӕр мӕгуырау уыдысты, фӕлӕ уӕддӕр ноджы фӕкъаддӕр сты. Уырны мӕ, уый рӕстӕгмӕ фӕзынд кӕй у", — банысан кодта Путин.
Йæ рады, Хуссар Ирыстоны президент банысан кодта, республикæ фидарæй кæй цæуы сæндидзæны процесс кæронмæ бакæнынмæ, уыимæ иумæ æддагон агрессийæ хи бахизыны фарстытæ кӕй сты приоритетон.
Йæ ныхæстæм гæсгæ, "Уæрæсейы æххуысы фæрцы, Хуссар Ирыстонмæ æрцыд сабырад, æмæ ныртæккæ республикæйы къухдариуæгады сæйраг хæс у, фæстаг цыппар азы цы стабилондзинадмæ цыдыстæм, уый бахъахъхъæнын".
"Хуссар Иры стыр аргъ кæнынц æмæ сæрыстыр сты, кæй йын ис Уæрæсейы æмцæдисоны статус, уымæн æмæ æддагон агрессийæ хи бахизыны фарст у приоритетон", — загъта республикæйы сæргълæууæг.
Тыбылты Леонид ма загъта, уæрæсейаг æххуыс алыхатт дæр кæй фæхæццæ вæййы йæ адресыл.
"Уыд алыгъуызон дæнцæгтæ раздæр æзты. Фидарæй мæ бон зæгъын у, мах кæй адарддæр стæм уыцы принципæй æмæ нын хорз уайы", — банысан кодта.
