ЦХИНВАЛ, 4 апр- Sputnik. Хуссар Ирыстоны ӕхсӕнадон транспорт баххӕст кодта йӕ автопарк ног автобустӕ ӕмӕ УАЗ-тӕй, фехъусын кодта Sputnik паддзахадон унитарон куыстуат "Хуссар Ирыстоны автомобилон транспортон управлени"-йы эксплуатацийы хайады хистӕр Зассеты Лев.
Ацы бонты горӕты ӕхсӕнадон транспорты ӕртӕ маршрутыл райдыдтой цӕуын ӕртӕ ног автобусы. Дыууӕ ног УАЗ та рахицӕн ӕрцыд горӕт Къуаиса ӕмӕ Ленингоры районы Орчъосаны хъӕуӕн.
"Райстам фондз ног машинӕйы, уыдон кусдзысты Цхинвалы, афтӕ ма Къуаиса ӕмӕ Орчъосанмӕ. Маршруттӕ Мӕскуыйаг, БАМ ӕмӕ Текстилыл цы машинӕтӕ куыстой, уыдонӕн сӕ иу хай уыдысты "Газель"-тӕ ӕмӕ цӕрджытыл не ‘ххӕссыдысты, уымӕн ӕмӕ райсом куыстытӕм фӕцӕуы бирӕ адӕм. Ныр ног автобустӕ нӕ куыстыл бандавдзысты хорзӕрдӕм", — загъта Зассеты Лев.
Уый ма куыд радзырдта, афтӕмӕй ныридӕгӕн куыстуат зындзинӕдтӕ ӕвзары Ленингоры районы Абреуы хъӕумӕ рейсыл — уырдӕм кусы зӕронд машинӕ, кӕцы фехӕлы арӕх.
"Хуссар Ирыстоны автомобилон транспортон управлени"-йы автопарчы ис 70 хӕдтулгӕйы. Уыдон ӕрвылбон дӕр рейстӕ кӕнынц горӕты мидӕг, республикӕйы районтӕм ӕмӕ хъӕутӕм. Афтӕ ма Дзӕуджыхъӕумӕ ӕмӕ фӕстӕмӕ ӕрвылбон дӕр цӕуы дыууӕ рейсы.
