ЦХИНВАЛ, 6 апр — Sputnik. Цӕгат Ирыстоны кинокомпани "Arsen Studio" сарӕзта Хетӕгкаты Къостайы уацмыс "Кæмæн цы…"-мӕ гӕсгӕ мультфильм.
Ирон ӕвзагыл мультфильмтӕ ӕмӕ кинонывтӕ сты стӕм, уый та къуыхцы кӕны мадӕлон ӕвзагы ахуыр кӕныны хъуыддаг. Уымӕ гӕсгӕ, ацы мультфильмы фӕзындӕн ис стыр ахуырадон ӕмӕ хъомыладон нысаниуӕг, нысан кӕнынц специалисттӕ.
Мультфильм саразын бантыст бизнесмен Цӕкулаты Арсены фӕрцы, кӕцы генералон продюсерӕй дарддӕр ма уыд проекты спонсор дӕр.
Мультфильм саразыныл куыстой продюсер Икъаты Мадина, аниматор Мария Дубровина, композитор Плиты Мурӕт, нывгӕнӕг Кацты Вадим ӕмӕ нывгӕнӕг-ӕвӕрӕг Гаппойты Наталья.
Кинокомпани йӕ куыстмӕ бавнӕлдта 2015 азы сӕрды. Афтӕ ма компани фӕнд кӕны ӕввахс рӕстӕджы ӕндӕр мультфильмтӕ дӕр саразын.
