ЦХИНВАЛ, 6 апр — Sputnik, Козаты Дианæ. Ленингоры поселочы æртыццæджы цытджын æгъдауæй баконд æрцыд бынæттон Культурæйы хæдзар. Церемонийы хайад райстой президент тыбылты Леонид æмæ республикæйы дыууæбонон визитимæ уæвæг, Хуссар Ирыстон æмæ Абхазимæ соцэкономæмгуыстады фæдыл УФ президенты управленийы сæргълæууæг Олег Говорун.
Культурæйы хæдзары капиталон цалцæг æмæ ифтонгады дзауматæн æхцайы фæрæзтæ рахицæн æрцыдысты Инвестпрограммæйы фæлгæтты. Уый нысанæн уæрæсейы бюджетæй рахицæн æрцыд 60, 5 милуан сомы. Бæстыхайы ис фойе. Стыр зал, кассæтæ, техникон хатæнтæ æмæ афтæ дарддæр. Сценæ ифтонг у нырыккон техникæ æмæ ифтонггарзæй. Систæ æмæ агъуыст æмбæрст сты сæрмагонд акустикон æрмæджытæй.
"Мах уынæм, куыд ивы поселочы бакаст. Æрæджы кæронмæ бахæццæ, район столицæимæ цы фæндаг иу кæны, уый. Ныр столицæмæ фæхæццæ гæнæн ис сахатмæ. Уый ахсджиаг у къухдариуæгадæн дæр æмæ адæмæн дæр", — загъта Тыбылты Леонид культурон центр бакæныны церемонийы рæстæджы.
Олег Говоруны ныхæстæм гæсгæ, бæстыхай бирæ рæстæг домдта цалцæг æмæ ныр цæрджытæ сæ фæллад уаддзысты нырыккон æмæ хæрзифтонг бæстыхайы.
"Алыхатт дæр мын æхсызгон у Хуссар Ирыстонмæ цæуын, кæцы фæстаг дыууæ азы ивы рæвдз темптæй. Хъыгагæн, нырма мын нæ бантыст ирон æвзаг сахуыр кæнын æмæ абон цы дзырдтой, уый иууылдæр нæ бамбæрстон, фæлæ мæ фидарæй уырны, уыдон кæй уыдысты хъарм ныхæстæ", — загъта Говорун.
Культурæйы хæдзары кусджытæ уазджытæн бацæттæ кодтой концерт, кæцыйы рæстæджы сæ арæхстдзинад равдыстой паддзахадон ансамбль "Симд" æмæ адæмон кафты ансамбль "Амонд"-ы артисттæ. Залы афтид бынæттæ нал баззад.
Тыбылты Леонид æмæ Олег Говорун ма фæуазæг сты сцалцæггонд ленингойраг сывæллæтты хæдзармæ. Сывæллæттæ дзы нæма ис, уымæн æмæ сæ цалцæггæнæн куыстыты рæстæгмæ акодтой æндæр бынатмæ. Уазджытæ æмæ республикæйы къухдариуæгад раппæлыдысты аразджытæй хорз куысты фæстиуджыты тыххæй, æмæ дзырд раттой, кæй æрцæудзысты сывæллæтты хæдзар бакæныны церемонимæ дæр.
Уый фæстæ уазджытæ инспекциимæ бацыдысты скъола æмæ сабидоны арæзтадмæ. Сабидон эксплуатацимæ лæвæрд æрцæудзæн ацы аз. Йæ арæзтадæн рахицæн æрцыд 94,5 милуан сомы.
176 скъоладзауы бынатæн скъолайы арæзтад уæрæсейаг бюджетæн слæудзæн 143 милуан сомы. Аразджыты ныхæстæм гæсгæ, уый арæзт æрцæудзæн фидæн азы.
