ЦХИНВАЛ, 8 апр — Sputnik. Цӕгатирыстойнаг вокалисткӕ, Гнесинты номыл Уӕрӕсейы музыкӕйы академийы студенткӕ Бесолты Фати хайад райдзӕн конкурс "Новая звезда"-йы дыккаг туры, фехъусын кодта Sputnik зарӕггӕнӕг.
Конкурсы фыццаг тур уагъд ӕрцыд февралы кӕрӕтты, уым та цӕгатирыстойнаг зарӕггӕнӕг сӕххӕст кодта Николай Носковы зындгонд композици "Снег" йӕхирдыгонау. Уый хыгъд райста 80 баллы ӕмӕ ахызт конкурсы дыккаг турмӕ.
"Стыр бузныг алкӕмӕн дӕр, кӕйдӕриддӕр фӕндыд ме ‘нтыст, ӕз тынг бирӕ хъарм ӕмӕ зӕрдӕлӕууӕн ныхӕстӕ фехъуыстон мӕ адресыл! Уый мын радта бирӕ тыхтӕ", — дзуры ирон чызг.
Конкурсы дыккаг тур уагъд ӕрцӕудзӕн телеканал "Звезда"-йы эфиры фарастӕм апрелы, 19:15 сахатыл.
Куыддӕр эфир фӕуа, афтӕ райдайдзӕн телекӕсджыты смс-хъӕлӕскӕнынад, уый фӕстиуджытӕм гӕсгӕ рабӕрӕг уыдзӕн конкурсы иууыл ӕнтыстджындӕр хайадисджытӕ, кӕцытӕ ахиздзысты ӕрдӕгфинал ӕмӕ финалмӕ. Бесолты Фатийы сӕрмагонд номыр у — z59 —.
