Гугкаты Эвелинæ: Филозовы хуызӕттимӕ аивгъуыйы æнæхъæн дуг

Рафыссын
РХИ адæмон артисткæ Филозовимæ ахуыр кодта МХАТ-ы цур скъола-студийы. Гугкаты Эвелинæ йын бахъуыды кодта йæ хæдæфсӕрмдзинад æмæ йæ хуссарирыстойнаг æмкъурсонмæ уарзондзинадæй.

ЦХИНВАЛ, 12 апр — Sputnik. Альберт Филозов уыд гениалон актер, кæцы сæххæст кодта бирæ ирд ролтæ театры сцæнæйыл æмæ кинойы, загъта Sputnik РХИ адæмон артисткæ Гугкаты Эвелинæ, кæцы Филозовимæ ахуыр кодта МХАТ-ы цур Немирович-Данченкойы номыл скъола-студийы.

Адæмон артист, кино æмæ театры актер Альберт Филозов амард къуырисæры 78 кардзыдæй. Уый бирæ рæстæг тох кодта уæззау онкологон низимæ. Актерæн фæстаг хæрзбон зæгъдзысты æртыццæджы "Нырыккон пьесæйы скъолайы" театры.

"Уый тынг æрхӕндæг хабар у. Цæуынц мæ фæлтæры актертæ æмæ уыдонимæ ивгъуыйы æнæхъæн дуг дæр", — загъта Эвелинæ.

Адæмон артисткæйы ныхæстæм гæсгæ, ахуыры рæстæджы Филозов иннæ æмкъурсонтæй уадиссаг ницæмæй хицæн кодта, фæлæ йæ бахъуыды кодта, кæй уарзта йе ‘мкъурсон Кумæридтаты Донарайы — ирон радиойы легендæ, Хуссар Ирыстоны культурæйы сгуыхт архайæджы.

"Иу хатт ын раргом кодта йæ уарзт, фæлæ йын Донара разыйы дзуапп нæ радта", — радзырдта артисткæ.

Уæрæсейы адæмон артист Альберт Филозов райгуырд 1937 азы 25 июны Свердловскы, райста зырнæйзилæджы професси, куыста завод "Шарикоподшипник"-ы. 1955 азы уый бацыд ахуырмæ МХАТ-ы цур скъола-студимæ, Виктор Станицыны курсмæ. Ахуыры фæстæ хъазыд Станиславскийы номыл Мæскуыйаг драмон театры, 1989 азæй та куыста "Нырыккон пьесæйы скъолайы".

Филозов йæ дæсныйады сусæгдзинæдтæ ‘ргом кодта ВГИК-ы актерон курсæн æмæ РАТИ-йы драмæйы режиссурæйы кафедрæйы. Уый ахъазыд сæдæ ролæй фылдæр ахæм кинонывты, куыд "Идеальный муж", "Вам и не снилось", "Кто, если не мы", "Мэри Поппинс, до свидания!", "В августе 44-го…", "Человек с бульвара Капуцинов" æмæ бирæ æндæрты.

Ног хабӕртты лентӕ
0