ЦХИНВАЛ, 18 апр — Sputnik. Дзæуджыхъæуккаг скъоладзау Тамайты Маргарита ссис æппæтуæрæсейон гуманитарон телеолимпиадæ "Умницы и умники"-йы уæлахиздзау æмæ йæ студийы бахастой МГИМО-йы студентты нымæцмæ, хъусын кæны Цæгат Ирыстоны Ахуырады министрады пресс-службæ.
Маргарита ахуыр кæны Дзæуджыхъæуы курдиатджын сывæллæтты æмæ фæсивæды центр "Интеллект"-ы. Маргаритæйæ дарддæр ма алæвæрды хайад райстой центры ахуыргæнинæгтæй ноджы дыууæйæ — Магкоты Алисæ æмæ Георгий Барбашов. Уыдон дæр бацыдысты финалы онг æмæ райстой льготæтæ престижон дипломатон ахуырадон уагдонмæ бацæуынæн.
"Алæвæрд "Умницы и умники"- мæ бахаудтæн конкурсон æвзæрсты руаджы, кæцы центр "Интеллект" уадзы æрвылаз. Мæ къухдариуæггæнæгимæ мах цадæггай æххæст кодтам мæ бæллиц: æз дæн МГИМО-йы студенткæ!", — загъта Маргаритæ.
Уæлдæр кълӕсты ахуырдзаутæн интеллектуалон гуманитарон олимпиадæ "Умницы и умники" цæуы сабат бонты "Фыццаг канал"-ы эфиры. Æхсæнадæмон ахастыты мæскуыйаг паддзахадон институты студент суæвыны бары тыххæй æргом ныхмæлæуды хайад исынц скъоладзаутæ Уæрæсейы регионтæ æмæ æввахс фæсарæнтæй.
