ЦХИНВАЛ, 19 апр — Sputnik. Ирыстоны хъайтартӕ Багаты Амиран ӕмӕ Джиоты Азӕмӕты номарӕн турнир баскетболӕй райдыдта Цхинвалы, фехъусын кодтой Sputnik фӕсивӕдон политикӕ, спорт ӕмӕ туризмы комитеты пресс-службӕйы.
Багаты Амиран ӕмӕ Джиоты Азӕмӕт фӕмард сты 2008 азы гуырдзиаг-ирон хӕсты фӕстиуӕгӕн. Знаджы ныхмӕ тохгӕнгӕйӕ уыдон равдыстой стыр хъӕбатырдзинад ӕмӕ сӕ цард ӕрхастой райгуырӕн бӕстӕйы сӕраппонд.
"Турнир цӕуы спартакиадӕйы фӕлгӕтты, конд у ӕртӕ этапӕй. Ерысты архайынц астӕуккаг ахуырадон уагдӕтты командӕтӕ. Тыхджындӕртӕ фӕбӕрӕг уыдзысты 29 апрелы", — загътой комитеты.
Баскетболы турнир организацигонд цӕуы фӕсивӕдон политикӕ, спорт ӕмӕ туризмы комитет, ахуырады министрад ӕмӕ баскетболы федерацийы тыхтӕй. Ерыстӕ цӕудзысты сывӕллӕтты спортивон скъолайы бӕстыхайы.
