ЦХИНВАЛ, 19 апр — Sputnik. Хуссар Ирыстоны Цхинвалы районы арæнхъахъхъæнджытæ ивгъуыд къуыри æрцахстой арæнсæттæджы, кæцы фæлвæрдта йæхи Уæрæсейы Федерацийы æмбæстаг схонын, фехъусын кодтой дыццæджы ПÆК-ы пресс-службæйы.
Арæнсæттæг ахст æрцыд 15 апрелы Цхинвалы районы Арцеуы хъæуы цур. Æрфарсты рæстæджы уый дзырдта, зæгъгæ у Уæрæсейы Федерацийы æмбæстаг, фæлæ равзæрсты рæстæджы рабæрæг, уымæн кæй ис гуырдзыстойнаг æмбæстагад æмæ цæры Тбилисы.
"Ныртæккæ ПÆК-ы Арæнгæрон службæ архайы æрмæджытæ тæрхондонмæ адæттыныл", — загъта пресс-службæйы кусæг.
Уыцы бон ма Гуырдзыстоны æмбæстаг, Гуры районы Ахрисы хъæуы цæрæджы ныхмæ, кæцы фехæлдта арæн Арцеуы хъæуы, баконд æрцыд уголовон хъуыддаг "Паддзахадон арæныл æнæзакъонон æгъдауæй рахызт"-ы статьямæ гæсгæ.
"Слестгæнæн куысты рæстæджы бæлвырд æрцыд, ацы адæймаг ма раздæр дæр кæй хаста административон æмæ уголовон бæрн аналогон фыдракæндты тыххæй", — банысан кодтой пресс-службæйы.
Тæрхондоны уынаффæмæ гæсгæ, ивар бафидыны фæстæ ма Хуссар Ирыстонæй феддæдуар кодтой Гуырдзыстоны æмбæстаджы, горæт Каспы цæрæджы.
