ЦХИНВАЛ, 22 апр — Sputnik. Хуссар Иры спортсменты делегаци хайад райсдзæн Æрыгон æмзæххонты дыккаг дунейон хъæзтыты, кæцытæ ацæудзысты 23-29 апрелы Сочийы, фехъусын кодта Sputnik РХИ-ы уæвæг Россотрудничествойы минæварады къухдариуæггæнæг Михаил Степанов.
Майрæмбоны уыдон афæндараст кодтой Цхинвалæй.
Æдæппæт дунейон хъæзтыты хайад райсдзысты æндæр æмæ æндæр бæстæтæй 37 командæйы. Хъæзтыты организатортæ сты УФ культурæйы министрад, ахуырад æмæ зонады министрад, парти "Иугонд Уæрæсе". Техникон организатор та у Россотрудничество.
Степановы ныхæстæм гæсгæ, Хуссар Ирыстон хъазтыты исы хайад дыккаг хатт. Ацы аз республикæйы кад хъахъхъæндзысты æмзæххонты æхсæнадон организациты уæнгты сывæллæттæ, кæцытæ не сты профессионалон спортсментæ. Хъæзтыты хайад исдзысты футболисттæ æмæ шахмæттæй хъазджытæ.
"Æмзæххонты координацион советы скъуыддзагмæ гæсгæ мах равзæрстам спорты дыууæ хуызы, кæцытæ сты иууыл уарзондæр æмæ популярондæр Хуссар Ирыстоны — футбол æмæ шахмæттæ", — радзырдта уый.
Организаторты скъуыддзагмæ гæсгæ, ацы аз хъæзтытæм ацыд 12 делегаты. Сывæллæттæ хайад исдзысты æрмæст спортивон мадзæлтты нæ, фæлæ ма уырыссаг æвзаджы конкурсты дæр. Уымæй дарддæр ма сын ауаддзысты мастер-класстæ ахæм темæтыл, куыд "Æрыгон лидер" æмæ "Æрыгон журналист".
Проекты фæлгæтты æрыгон хайадисджытæм æнхъæлмæ кæсы уæрæх культурон программæ — экскурси "Красная поляна"-мæ, Уæлахизы мемориалмæ дидинты сæвæрд, турнир "Золотая шайба"-йы фæлгæтты хоккейон матчмæ бацыд.
Спортсменты командæйæн экипировкæйы фарстыты стыр æххуыс бакодта Хуссар Ирыстоны хицауад.
