ЦХИНВАЛ, 29 апр — Sputnik, Козаты Диана. Хуссар Ирыстоны уæвæг УФ Æдасдзинады федералон службæйы арæнгæрон управленийы сырæзтыл авд азы сæххæсты цытæн уагъд æрцыд чемпионат хæстон къухæй архайгæ хæцæнгарзæй æхстæй.
Æхсæгтæй чи цырддæр æмæ арæхстджындæр равдыста йæхи, цы хæслæвæрдтæ сæ хъуыд сæххæст кæнын, уымæн æвдисæн уыдысты Sputnik уацхæсджытæ дæр.
Ярыгины пистолет, Калашниковы автомат æмæ снайпераг винтовкæйæ хуыздæр æхсæджы номыл ерыс кодтой чемпионаты 35 хайадисæджы. Уыдон адих кодтой фондз командæйыл, кæцытæ архайдтой ÆФС Арæнгæрон управленийы Дменис, Ленингор, Знауыр æмæ Дзауы хайадтæ, афтæ ма фæткдаруаты аппараты номæй.
Чемпионаты сæйраг тæрхонгæнæг, Арæнгæрон фæткдаруаты минæвар Александр Смирнов журналисттæн куыд загъта, афтæмӕй æхстæй ерыстæ уагъд цæуынц æрвылаздæр æмæ сты куыд æвзæрстон этап УФ ÆФС семпионатмæ.
"Ацы ерыстæ нывонд сты Хуссар Ирыстоны Арæнгæрон управленийы сырæзты авд азы сæххæсты цытæн. Хайад дзы райстой управленийы кусджытæ, уыдон нымæцы сылгоймаг-æфсæддон службæгæнджытæ", — загъта Смирнов.
Хайадисджытæ хæцæнгарзимæ архайынæй сæ арæхстдзинад равдыстой цалдæр хæслæвæрды.
Арӕнхъахъхъӕнджытӕ ерыс кодтой командон æмæ хисæрмагонд фыццагады, уыимæ иумæ тох райтынг куыд нæлгоймæгты, афтæ сылгоймæгты æхсæн. Хайадисджытæ хъуамæ тагъд æмæ раст сцæф кодтаиккой нысæнттæ, кæцытæ æвæрд уыдысты æндæр æмæ æндæр дæрддзæгы — 25 метры пистолетæй æхсæгтæн, 100 метры автоматæй æхсæгтæн æмæ 150 метры та снайпертæн.
Автоматæй æхсджытӕ хъуамæ сæххæст кодтаиккой хæслæвæрд АК-3, ома фехсын хуысгæйæ, уæрджытыл лæугæйæ æмæ лæугæйæ. Ахæм позициты æхстой алы командæйы снайпертæ дæр.
Ерысты фæстиуджытæм гæсгæ, иумæйаг командон бахыгъды хуыздæр разынд Управленийы фæткдаруаты командæ. Дыккаг бынат бацахста Знауыр, æртыккаг та Ленингоры командæ. Цыппæрæм æмæ фæндзæм бынæттыл та сты Дзау æмæ Дменис.
Уæлахиздзаутæ хорзæхджын æрцыдысты майдантæ æмæ грамотæтæй. Цæттæдзинады иумæйаг æмвæзадæн тæрхонгæнæг радта æвæрццаг аргъ.
Ерысты фæстæ сæйраг тæрхонгæнæг радта æхсты бар журналисттæн. Фæлтæрдджын инструкторты æххуысæй журналисттæ æнтыстджынæй сæххæст кодтой "хæслæвæрд".
Арæнгæрон управленийы радон ерыстæ уагъд æрцæудзысты майы æмæ нывонд уыдзысты Арæнхъахъхъæнæджы бонæн.
